Қазалы аудандық сотымен ҚР ҚК-нің 345-бабы 1-бөлігі бойынша айыпталушы А.-ға қатысты қылмыстық іс қаралды.

Сот талқылауында анықталғандай, айыпталушы А. өзінің басқаруындағы «Ауди» маркалы автокөлігімен Әйтеке би кенті мен Қазалы қаласы арасындағы тас жол бойында келе жатып, Қазақстан Республикасының «Жол жүрісі қағидасын» өрескел бұзып, жол қауіпсіздік шараларын қамтамасыз етпестен, жолдың қарама-қарсы бағытынан тіке келе жатқан «ВАЗ 21214» маркалы автокөлігіне жол бермей соқтығысып, жол-көлік оқиғасын жасаған. Нәтижесінде «ВАЗ 21214» маркалы автокөлігінің жолаушысы С.-ның денсаулығына орта дәрежелі зиян келтірген.

Сот отырысында сотталушы А. өз кінәсін толық мойындады. Ал, жәбірленуші С. сотталушыға кешірім бермейтінін көрсетіп, заң жүзінде жаза тағайындауды сұрады.

Сот үкімімен сотталушы А., Қазақстан Республикасы ҚК-нің 345-бабының 1-бөлігімен кінәлі деп танылып, оған көлік құралын басқару құқығынан 2 жылға дейiнгi мерзiмге айыру және 200 сағат қоғамдық жұмысқа тарту жазасы тағайындалды.

Үкім заңды күшіне енген жоқ.