Мерекедегі мерейлі марапат
Қазақстан Республикасы Президенті Қасым-Жомарт Тоқаевтың Жарлығымен Тәуелсіздік күні мерекесі қарсаңында елдің дамуына қосқан елеулі үлесі үшін бір топ азамат мемлекеттік наградалармен марапатталды.Қызылорда қаласында ел Тәуелсіздігінің 30 жылдығына арналған «Жасампаздыққа толы жылдар» атты салтанатты шарада марапат төрінен көрінгендердің қатарында қазалылықтар да бар.
«Құрмет» ордені кәсіпкер, меценат, облыстық мәслихат депутаты Ібайдулла Тілептің мерейін асырса, «Еңбек Даңқы» орденін «РЗА-Агро» ЖШС бас агрономы Нұрлан Наурызбай кеудесіне тақты.
Елдің әлеуметтік-экономикасын дамытуға еңбек сіңірген қайраткер азаматтарға берілетін мемлекеттік награда – «Құрмет» ордені лайықты иесін тапты. Себебі Ібайдулла Тілептің Қазалы ауданының экономикасы дамуында өзіндік үлесі бар.
Бүгінде кәсіпкерлігімен қатар меценаттығымен танымал азаматты қазалылықтар жақсы біледі десек артық айтқандық емес. Сонымен қатар, Ібайдулла Тілеп бірнеше жылдан бері облыстық мәслихаттың депутаты ретінде аудандағы түйіткілді мәселелердің оң шешімін табуына елеулі үлесін қосып жүр.
Салтанатты шарада аймақ басшысы Гүлшара Наушақызы Әбдіқалықованың қолынан Б.Мергенбаев атындағы №226 мектеп-гимназияның мұғалімі Асқар Олжакеш, «Жеңіс» шаруа қожалығының жетекшісі Есет Серімов, «Агро-Өркен» ЖШС директоры Медеу Есқожаев, Қазалы арнаулы әлеуметтік қызметтер көрсету орталығының мәдени ұйымдастырушысы Жұбаназар Әбуов Қазақстан Республикасының «Құрмет» грамотасын алды.
«ҚАЗАЛЫ» ақпарат
