Салтанатты шарада аудан әкімі Мұхтар Оразбаев құттықтау сөз сөйлеп, мемлекет тарапынан білім саласына көрсетіліп жатқан қолдау мен мұғалімдердің қоғамдағы арқалар жүгі ауыр екенін тілге тиек етті.

– Өткен жылы аудандағы бірқатар білім беру нысандарына жөндеу жұмыстары жүргізілді. Олардың қатарында Әйтеке би кентіндегі №226 мектеп-гимназия мен «Шағала» лагері бар. Биыл №226 мектеп-гимназияға тағы да қосымша спорт зал құрылысы салынып, пайдалануға берілді. Одан бөлек, Әйтеке би кентіндегі бұрынғы №170 мектептің орнына 250 орындық жаңа мектептің құрылысы басталды. Өткен оқу жылында ұлттық бірыңғай тестілеудің қорытындысымен Қазалы ауданы жоғары көрсеткішке қол жеткізіп, облыс бойынша бірінші орынға орналасты. Мұның бәрі – сіздердің еңбектеріңіздің нәтижесі, – деп Мұхтар Әәуесұлы ұстаздардың еңбегіне табыс тіледі.

Одан бөлек облыстық білім және ғылым қызметкерлері кәсіподақ ұйымының төрағасы Гүлнәр Есқалиева да сөз сөйлеп, мұғалімдерді мерекесімен құттықтады.

Мұнан кейін аудан әкімі Мұхтар Оразбаев облыстық мәслихат депутаты Гүлнәр Есқалиевамен бірге білім саласының дамуына үлес қосып, шәкірттерге сапалы білім, саналы тәрбие беріп жүрген бірқатар ұстаздарды «Алғыс хаттармен», «Құрмет Грамоталарымен» марапаттады.

Сондай-ақ, 4 педагог қазақстандық салалық білім және ғылым қызметкерлері кәсіподағына сіңірген еңбегі үшін төсбелгімен марапатталды.