Көп көңілін көншіткен

Өткен жексенбіде облыстық «Алтын дән – 2020» шарасы аясында Қызылорда қаласында ауылшаруашылығы өнімдерінің жәрмеңкесі өтті. «Шұғыла» мөлтек ауданында болған шараға Қазалы ауданы кәсіпкерлерінің қатысуымен ауылшаруашылық өнімдері ұсынылды. Жергілікті тауар өндірушілер мен кәсіпкерлер барлығы 34 көлікпен құны шамамен 19 миллион теңгені құрайтын, 100 тоннаға жуық өнім апарды.

Аудан бойынша жылына 6,5-7,0 мың ет және 18 мың тонна сүт өндіріліп, орта есеппен 4-5 мың тонна шамасында балық ауланып жүр. Жыл сайын соның 5,5 мың сүт, 1 мың ет және 1,5 мың тонна балықты өңдеп, облыс, республика көлемінде өткізіп, тіпті кей өнім түрлері шетелге экспорттап отырған бірден-бір аудан екенін мақтанышпен айта ­аламыз.

Өткізілген жәрмеңкеге Ақжона ауылдық округі белсене атсалысып, қала тұрғындарына азық-түлік ұсынса, Бекарыстан би ауылынан жеткізілген балық өнімдері сатылды.

Негізі биылғы жылдың 9 айында 1940 тонна ақ күріш пен күріш жармасы және 983,6 тонна балық өнімі экспортталды.

«Алтын дән – 2020» шарасы аясында Қазалы ауданы ауылшаруашылығы өнімдерін өңдеуде жоғарғы жетістіктерге жеткені үшін «Озат аудан» номинациясын иеленген болатын.

Айта кетейік, өнімдер нарықтан 10-15 проценттік төмен бағада сатылды. Аталған жәрмеңкеге келушілер қарасы қалың болып, Қызылорда тұрғындары аудан халқына ризашылық білдіріп, алғыстарын айтты.