Өткен аптада аудандағы бірқатар ұстаздар білім бөлімі басшысының қабылдауында болды. Аталған жүйенің дамуына ерекше үлес қосып келе жатқан Дәулет Бақытбергенов, Эльмира Нұрмағамбетова, Әлия Сағымбай, Еркебұлан Рахов, Ұлболсын Алматова сынды ұстаздар қауымы ҚР Білім және ғылым министрлігінің Құрмет грамотасы мен Алғыс хатын, ҚР Мәдениет және спорт министрлігі, Спорт және дене шынықтыру істері комитетінің марапатын еншіледі. Сондай-ақ басқосуда бірнеше ұстазға Қызылорда облысының білім басқармасы «Дарын» қосымша білім беру орталығының Алғыс хаты табысталды.

Жиын барысында аудандағы мектепалды тәрбие жұмысына айтарлықтай үлес қосып келе жатқан Эльмира Нұрмағамбетова ризашылық пейілін ақтарыла жеткізді.

– ҚР Білім және ғылым министрлігінің Құрмет грамотасын алдым. Шүкір, бұл бүгінге дейін білім саласындағы еңбегімнің қайтарымы. Жұмысымның еленгені. Үздіктер қатарынан төбе көрсетіп, ерекшеленгенім деп білемін. Тек мен ғана емес мұндай марапатқа аудандағы барлық әріптестер лайық. Сондай-ақ атқарып жатқан ісімізді елеген басшылыққа ризашылығымды білдіремін, – деді ол.

Шара соңында білім бөлімінің басшысының міндетін атқарушы Бектұр Қали жас ұрпақтың білім кеңістігін кеңейтуге атсалысып, ел игілігіне қызмет етіп келе жатқан аяулы жандарға шығармашылық даму мен толағай табыс тіледі.