Тартысты бәсекеге аудан бойынша 16 команда қатысты. Оның 7-еуі волейболдан, қалған 9-ы өзара дойбы ойнаудан сынға түсті. Бірнеше сағатқа созылған доданың жеңімпаздары анықталды. Оларға кубок пен сыйлық үлестіруге аудандық спорт, аудандық білім бөлімі мен кәсіподақ комитеті және алғашқы әскери дайындық пәнінің мұғалімдері мен мектептің кәсіподақ комитеті демеушілік жасағанын айта кеткен жөн.

Турнир қорытындысына сәйкес Жалаңтөс батыр ауылындағы №103 мектептен құралған топ бірінші орынды иемденді. Қашақбай Пірімов ауылындағы №92 мектептің саңлақтары екінші, Ақтан батырлық №190 мектептің спортшылары үшінші орынды місе тұтты. Ал №70 мектептен құралған командаға аталған мектеп директоры Қымбат Сермаханның ынталандыру сыйлығы бұйырды.

Ой жарысының жүлдегерлері де жеңіске жету үшін аз еңбектенген жоқ. Біріне сәттілік серік болса, екіншісі бабы сай болып абырой биігінен көрінді. Бұл орайда Қ.Пірімов ауылының тумасы Сәбит Шүленбаев бірінші орынды олжалады. Екінші орынды №249 мектеп-лицейден Ахмет Айнадин, үздік үштікті белгілі тарихшы Бақытжан Түменбаев шегендеді.

Турнирдің жабылу салтанатын аудандық білім және ғылым қызметкерлері кәсіподақ комитетінің төрағасы Әбілқасым Раман қорытындылап, жүлдеге ие болған командаларды марапаттады. Сонымен қатар Ш.Сарбалаевқа аудандық білім және ғылым қызметкерлері кәсіподақ комитетінің Алғыс хатын, облыстық кәсіподақ комитетінің құттықтауын, «Nur Otan» партиясы аудандық филиалы мен аудан әкімінің орынбасары Әлімжан Жарылқағановтың Алғыс хатын, «Бейбітшілік Әлемі» Халықаралық Қазақ Творчествалық Бірлестігінен «Ыбырай Алтынсарин» төсбелгісін табыстады.