Сумен жабдықтау нысандары жаңғыртылды

ҚР Ұлттық Экономика Министрлігінің табиғи монополияларды реттеу, бәсекелестікті және тұтынушылардың құқықтарын қорғау комитетінің Қызылорда облысы бойынша департментінің бастамасымен «Қазсушар» РМК-ның «Арал» салынып жатқан кәсіпорындардың бірлескен дирекциясы филиалының құрылысы аяқталған және қайта жаңғыртылғаннан кейінгі нысандарын көруге қатысқан журналистер үшін, баспасөз туры өткізілді.

2017 жылы филиалдың өз қаржысы есебінен Қызылорда облысындағы Арал, Қазалы аудандарын сумен жабдықтау нысандарына барлығы 659,992 млн теңге инвестиция тартылды.

Инвестиция мақсаты – пайдаланылатын энергия ресурстары мен апаттардың деңгейін түсіру, жұмыстың сенімділігін қамтамасыз ету, ауыз судың сапасын арттыру және халықты үздіксіз ауыз сумен қамтамасыз ету.

Қызылорда облысы бойынша ауыз суды үздіксіз беруді қамтамасыз ету үшін 2017 жылы:

– Қазалы ауданындағы Жалаңтөс батыр елді мекенінде тұтынушылар учаскесінің шекарасына ауыз су құбырын жеткізу желілерінің құрылысы жүргізіліп, 15,7 шақырым d90-20 мм полиэтилен құбырлары және 43 көру құдықтары орнатылды;

– Қазалы ауданындағы Арал-Сарыбұлақ топтық су құбырының №7 су айдау станциясын қайта жаңарту және жаңғырту жобасы бойынша 7 000 текше метрлік 2 дана су қоймасы мен 4 сүзгі-жұтқыш үшін ішкі алаңдық 0,4 кВ электр желілері және бақылау-өлшеу құрылғылары мен автоматика кабельдері жүргізіліп, ойығы бар бөлек жәшіктегі есептеу құрылғысы орнатылды. Қазіргі таңда Қазалы ауданының 58 мыңнан астам халқы сапалы ауыз сумен қамтамасыз етіліп отыр, құрылыс жұмыстары мердігер «РЗА» АҚ-мен атқарылды;

– Арал ауданындағы Арал-Сарыбұлақ топтық су құбырының бас тоған ұңғымаларын қайта жаңғырту және жаңарту жұмыстары бойынша жаңадан 12,5 шақырым құбырлары жүргізіліп және 43 көру құдықтары орнатылды.

Инвестициялық бағдарламаны іске асырғаннан кейін нормативтік ысыраптар 1,95% және негізгі қорлардың тозығы 0,50% төмендеді.