Қазалы Қазалы аудандық қоғамдық-саяси газет
» » Мылтықбай – мақтаулы маман

Мылтықбай – мақтаулы маман

Бұл өмірде болмысы бөлек адамдар болады. Олар өз істерін айқай-шусыз, даңғара-дабырасыз тындыра береді. Олар көпке сөзімен емес, ісімен үлгі. Ондай жандар біздің арамызда да жоқ емес. Сирек болса да кездесіп жатады. Сондай жандардың бірі Мылтықбай Лепесов десек, артық айтқандық емес. Қырық жылға жуық өмірін құрылыс саласына арнаған кәнігі маман бүгінгі таңда Әйтеке би кентінің 5 квартал аймағындағы 18 пәтерлі көпқабатты тұрғын үйдің бой көтеруіне атсалысып, аудан сәулетінің ажарлана түсуіне үлес қосуда.
Бүгінгі таңда Мылтықбай Лепесов “РЗА” акционерлік қоғамында өндірістік жабдықтау бөлімінің мең­герушісі болып еңбек етеді. Алғашқы еңбек жолын Қызылдың қиясындағы Қызылқұм совхозында бастаған ол 1989 жылы Самұрат Имандосов басқаратын мекемеге жұмысқа келді. Сол жылдардан бері тәжірибелі маман құрылыс жұмыстарына араласып келеді.
Мақтаулы маман Арал-Сары­бұлақ топтық су құбырының 5 кезеңі­нің құрылысын, К-2-1, К-2-2 су қашыртқыларының жүйесін жаңарту, Арал ауданындағы 8 ауылдың (Бек­бауыл, Үкілісай, Құмбазар, Ақша­тау, Шөмішкөл, Қызылжар, Ра­йым, Ескі­ұра) су жүйесін Арал топ­тық су құбырына қосу, Ақөзек учаскесінде 660 бас сауын сиырға арналған кешен мен тәулігіне 30 тонна сүт өндіретін зауыттың құрылыс жұ­мыстарын жүр­гізуге, Әйтеке би кентіндегі жылу жүйесін қайта жаң­ғырту жұмыстарына, Аранды ауыл­дық округіндегі “Қарлаң” каналын қайта құрылымдау, Ү.Түктіба­ев ауы­лындағы 50 орын­дық амбула­торияның және 150 орындық мәде­ниет үйінің құрылыс жұмыс­тарын жүргізуге аянбай атсалысты.
Күннің ыстығына да, суығына да қарамастан құрылыс жұмыстарын жүргізетін Мылтықбай сияқты маман­дардың жұмысы оңай деп айта алмаймыз. Қазіргі таңда ол “РЗА” АҚ-ға сеніп тапсырылған құрылыстың уақытында тапсырылуы үшін құры­лысшыларды керекті материалдармен қамтамасыз етіп отыр.
– Біздің құрыш қолды құры­лысшылар ауданда салынады деген алты 18 пәтерлі көпқабатты тұрғын үйдің біреуінің құрылысын аяқтауға жақын. Негізінен бұл жұмыстарды бастауға тиісті қаражат әлі бөлінген жоқ. Әйтсе де, бізге акционерлік қоғам президенті Самұрат Жұманұлы өз қаражаты есебінен құрылыс жұмыстарын бастап кетуге тапсырма берді. Соның нәтижесінде тұрғын үйді тапсыратын күнге де жақындап қалдық. Қазіргі таңда жұмысшылар шатырды жабуға дайындалып жатыр. Ғимараттың ішіне су кіргізіліп, жылу жүйесі жүргізілді. Сылақтары сыланып, әрлеу жұмыстары да аяқталды. Амандық болса, жақын күндері бұл нысанды да тапсыратын боламыз, – дейді Мылтықбай Лепес­ов.
Жұмыста жауапкершілігі мол, ісіне мығым, кәсіби тәжірибесінің арқасында қызметте көпке үлгі болған құрылысшының мекеме басшыларынан алған грамоталары мен Алғыс хаттары жетерлік. Одан бөлек, аудан және облыс әкімдерінің де Алғыс хаттарымен марапатталған. Көп мақтауды сүймейтін Мылтықбай Лепесов әңгіме арасында кейін­гі жылдары облыста, оның ішінде біздің ауданда құры­лыс саласы қар­қынды дамып, осы ауқымды саланы алға жылжытуда құрылысшылар айтар­­лықтай еңбек сі­ңіріп жатқанын жет­кізді.
Қай мамандықтың та оңайы жоқ. Қай-қайсысының да өзіне тән қиыншылығы мен қы­зығы бар. Сол се­бепті жастардың маман­­­дық таңдауда әб­ден ойланып, қо­лы­­нан келетін істің тізгінін ұстағаны дұ­рыс. Ал жұмысында мақтаулы, тынды­рымды, еңбекқор Мылтық­байдай ма­манға қандай мақтау айтса да жарасады.
Жеңісбек АЙЫМҚҰЛОВ

11 тамыз 2018 ж. 104 0

Жаңалықтар мұрағаты

«    Қазан 2018    »
ДсСсСрБсЖмСбЖс
1234567
891011121314
15161718192021
22232425262728
293031