Геологтар пайдалы қазбалар кенінің орны мен оның басқа да ерекшеліктерін керннің әр метрін зерттеу арқылы анықтайды. Ал жаңадан ашылған керн қоймасында жер қойнауынан бұрғыланып алынатын жерасты жынысының сынамалары сақталып, одан әрі терең зерттеу жүргізуге мүмкіндік береді.

Жалпы әлемдік стандарттарға сәйкес геологиялық зерттеумен айналысатын аймақта керн қоймасының болуы міндетті. Себебі барлау жұмыстары 6-дан 11 жылға дейін ұласуы мүмкін. Керн қоймасы осы уақыт аралығында сынаманың сақталуын және кен орнының қорын есептеу кезінде құрамында металдардың бар-жоғын растау үшін қажет.

Бүгінге дейін Қазақстанда толық циклді мамандандырылған керн қоймалары болған жоқ. Керн материалдары базаларда немесе ашық аспан астында сақталып келді. Ал бұл зерттеу сапасына теріс әсерін тигізуі мүмкін. Осы ретте ERG компаниясы Қостанай және Ақтөбе облыстарында керн қоймаларын салумен айналысты. Ақтөбе облысындағы көлемі 50 мың метр болатын екі негізгі қойманы да биыл іске қосу жоспарланып отыр.

Қостанайдағы ERG GeoHub заман талабына сай жасақталған. Ол автоматтандырылған деректер базасының, оның ішінде мультимедиалық сүйемелдеудің болуымен ерекшеленеді.

– Жеке ERG GeoHub керн қоймасының болуы бізге керн материалдарын сенімді жерде сақтауға мүмкіндік береді. Бұдан бөлек ол қажет болған жағдайда қосымша зерттеу жұмыстарын жүргізуге және кез келген сыртқы немесе ішкі аудитке тиісті геологиялық ақпаратты растау үшін де керек. Сонымен қатар елдегі геологиялық барлау жұмыстарының әлемдік стандарттарға сай жұмыс істеуіне, қызмет тиімділігінің артуына да септігін тигізеді. Мұның барлығы өз кезегінде ERG тобының тиімділігін нығайтуға ықпал етпек, – дейді «ERG Exploration» ЖШС Бас директоры Азамат Шалабаев.

Ғимарат ішіндегі жедел тілуге арналған заманауи автоматтандырылған керн тілу жабдығы қол еңбегі мен процестің қоршаған ортаға тигізетін әсерін барынша азайтуға септігін тигізеді. Тіпті кернді құжатқа енгізуге арналған арнайы автоматтандырылған құжаттама үстелдер де орнатылған.

Қойманың жанында сынама дайындау цехы орналасқан. Ол ALS халықаралық зертханалар желісімен бірлесе отырып іске қосылды. Мұнда ERG Exploration-ның барлық үлгісі зерттелетін болады.

Ал барлау процестерін автоматтандыруға және геологиялық ақпараттың бірыңғай базасын құруға австралиялық acQuire компаниясы көмектесті.

«Бұл геологиялық хабтың құрылысы мен оның іске қосылуы – саланың дамуына серпін береді. Мұндай хаб алғаш рет жеке инвестициялар есебінен салынды. Ол республикада осындай форматта жұмыс істейтін жалғыз кешен. Астанада 300 мың қума метр сынама қоймасын салу жоспарланған. Жұмыстарды жобалау жүріп жатыр. Ол материалдарды сақтауға арналған үлкен қор болады», - деп атап өтті Ерлан Ақбаров.

ERG Exploration геологиялық барлау жұмыстарының толық циклімен айналысады. Яғни, жобалау, далалық және геофизикалық жұмыстар, ұңғымаларды бұрғылаудан бастап кен орындарын 3D форматта модельдеу және KAZRC, JORC сияқты халықаралық стандарттарға сәйкес қорлар мен ресурстар туралы есептер әзірлеу сынды жұмыстарды қамтиды. Жоспарды жүйелі жүзеге асыру үшін жоғары білікті мамандар құрамы жасақталды.

ERG Exploration осымен екінші жыл қатарынан барлау жұмыстарын өз күшімен атқарып келеді. Рудный мен Хромтау қалаларында озық деңгейлі әрі тиімділігі жоғары бұрғылау жабдықтарымен жарақталған өндірістік базасы орналасқан. Компанияның бұрғылау паркінде қосалқы техника, тұрғын жайлар, асхана вагондары мен ұңғымаларда геофизикалық зерттеу жұмыстарын жүргізуге қажетті жарақтардың толық кешені бар.

2022 жылы кәсіпорын өз күшімен 21 мың есепті метр бұрғылады. Алдағы уақытта бұл көрсеткішті жылына 100 мың есепті метрге дейін ұлғайту жоспарланған. Осыған орай, компания бұрғылау қондырғыларының санын 10-ға жеткізуді көздеп отыр. Бұл өз кезегінде жаңа жұмыс орындарының пайда болуына жол ашады.