Қазалыда Гидротехникалық құрылыстарға жөндеу жұмыстары жүргізілуде
Жылдан жылға Сырдария өзеніндегі су деңгейінің төмендеуіне байланысты егістікке су жіберетін канал бойындағы гидротехникалық құрылыстарға жөндеу жұмыстарын жүргізіп, механикалық тазалаудың маңызы жоғары.Сондықтан да биыл «Қазалысушар» өндірістік учаскесінің теңгеріміндегі «Сол жаға» магистралды каналы бойындағы гидротехникалық құрылыстарға ағымдағы жөндеу жұмыстары жүргізіліп жатыр.
Бүгін аудан әкімі Мұхтар Оразбаев пен аудандық мәслихат хатшысы Бақытжан Жарылқап Өркендеу ауылдық округіндегі «Сол жаға» магистралды каналына арнайы барып, құрылыс жұмыстарының барысын көрді.
Мұнда «Қазалысушар» өндірістік учаскесі бастығының орынбасары Нұрлан Әбілдаев атқарылып жатқан жұмыстармен таныстырды.
Қазіргі таңда магистралды канал бойындағы 7 бас су өткізгіш гидротехникалық құрылыс пен 15 гидромостқа жөндеу жұмыстары жүргізілуде. Құрылыс жұмыстары жақын күндері аяқталады.
Сондай-ақ, «Сол жаға» магистралды каналының 3 шақырымына механикалық тазалау жұмыстары жүргізіліп жатыр.
Аудан әкімі Мұхтар Оразбаев Сырдария өзенінің төменгі жағында орналасқан Қазалы ауданы үшін бұл құрылыс жұмыстарының маңызы жоғары екенін атап өтті.
"ҚАЗАЛЫ" ақпарат
