Кездесу барысында білім саласына қатысты сұрақтар қойылып, бірқатар мәселелер талқыға салынды. Олардың негізгісі білім саласының жан басына шаққандағы қаржыландыруға көшуі жайы. Осыған байланысты ауылдық жерлердегі балабақшалардың жағдайы мәз емес екендігі айтылды.

Сондай-ақ, жиынға ҚР Білім және ғылым вице-министрі Каринова Шолпан Таңатқызы онлайн форматта қатысып, қойылған сұрақтарға тиісті деңгейде жауап берді.

Мұнан соң халық қалаулысы аудан әкімдігінің ғимаратында қоғамдық қабылдау жүргізді. Қабылдау барысында тұрғындар тарапынан Әйтеке би кенті мен Қазалы қаласы арасындағы 4 жолақты жолдың және Қарлаң учаскесіндегі көпірдің уақытылы аяқталуына бақылау жүргізілсе деген ұсыныстар айтылды.

Фракция мүшесі жеке қабылдаудан кейін Әйтеке би кенті мен Қазалы қаласы арасындағы 4 жолақты жолдың құрылысымен танысты. Сонымен қатар №70 мектепте кент тұрғындарымен жаңа мектеп салу, ерекше балаларға қажетті кабинеттерді ашу сынды тақырыптарда пікір алмасты.

Аталмыш жиындарға «AMANАT» партиясы аудандық филиалының төрағасы, аудан әкімі Мұхтар Оразбаев, облыстық мәслихат хатшысы Наурызбай Байқадамов, аудандық мәслихат хатшысы Бақытжан Жарылқап, облыстық мәслихат депутаттары Тілеп Ібайдулла мен Мінажадин Өтеев және тиісті сала өкілдері қатысты.