Қазалы ауданы 100 пайыз таза ауыз сумен қамтылды

Мемлекет басшысы Қасым-Жомарт Тоқаев халыққа арнаған Жолдауында 2025 жылдың соңына дейін еліміздің барлық тұрғындарын таза ауыз сумен қамтамасыз ету міндетін қойған болатын. Осы тапсырманы орындау мақсатында Қазалы ауданында 2025 жылы ауыз су инфрақұрылымын дамытуға бағытталған ауқымды жұмыстар жүргізілді.

Атап айтқанда, Сарбұлақ, Шилі, Шәкен және Шитүбек елді мекендерін таза ауыз сумен қамтамасыз ету үшін тиісті жобалар жүзеге асырылды. Құрылыс жұмыстарына мемлекетке қайтарылған активтер есебінен, республикалық және облыстық бюджеттерден, сондай-ақ арнайы есепшоттан жалпы көлемі 1,5 миллиард теңге қаржы бөлінді.

Бөлінген қаражат есебінен құрылыс жұмыстары толық жүргізіліп, аталған төрт елді мекенде таза ауыз су жүйелері пайдалануға берілді. Нәтижесінде ауыл тұрғындары үшін тіршілік нәріне қолжетімділік қамтамасыз етіліп, халықтың тұрмыс жағдайын жақсартуға мүмкіндік туды.

Таза ауыз сумен қамту – елді мекендердің тұрақты дамуы мен тұрғындардың әл-ауқатын арттырудағы негізгі көрсеткіштердің бірі. Қазалы ауданында атқарылған бұл жұмыстар Мемлекет басшысының тапсырмасын орындау жолындағы маңызды нәтижеге айналды.

Осылайша, 2025 жылы жүзеге асырылған жобалардың нәтижесінде Қазалы ауданының халқы 100 пайыз таза ауыз сумен қамтылды. Бұл – ауданның инфрақұрылымын дамыту бағытындағы маңызды жетістіктердің бірі әрі тұрғындар үшін өмір сапасын жақсартуға жасалған нақты қадам.