Ү.Түктібаев есімі берілді
Кеше Қызылорда қаласындағы бұрынғы Т.Шевченко атындағы көшеге Кеңес Одағының батыры Үрмәш Түктібаевтың есімі берілді. Кеңес Одағы батырының атына көше беру және ескерткіш тақтаның ашылу шарасына ҚР Парламенті Сенатының депутаты Мұрат Бақтиярұлы, Қызылорда қаласы әкімінің орынбасары Жанмұрат Сейілов, облыстық ардагерлер кеңесі төрағасының орынбасары Өмірбек Мөрәліұлы, Ү.Түктібаевтың бауырлары, ағайын-туыстары мен қала тұрғындары қатысты.– Мереке күнi бiз азаматтық арды ту етіп, өз өмiрлерiн құрбан еткен батыр бабалардың алдында бас иемiз. Салтанатты түрде ашылғалы тұрған жаңа көше, ынтымақты халқымыздың мерейін асқақтатар көрікті орындардың біріне айналсын, – деген қала әкімінің орынбасары Жанмұрат Жақсымұратұлы барлық қатысушыларды мерекелерімен құттықтады.
Сондай-ақ, шара барысында Сенат депутаты Мұрат Бақтиярұлы мен облыстық ардагерлер кеңесі төрағасының орынбасары Өмірбек Мөрәліұлы батырдың өмір жолы туралы естеліктер айтты.
«ҚАЗАЛЫ» ақпарат
