Сенатордың айтуынша, елімізде су ресурстарын жоспарлау және бақылау жүйесі жетілмеген.

"Біз әлі күнге дейін республикадағы су ресурстарының қорлары туралы нақты ақпаратты білмейміз. Мемлекеттік су кадастрын қазіргідей жеке ұйымдар емес, "Қазгидромет" кәсіпорыны жүргізуі тиіс. Ол үшін су қорының мониторингін цифрлық форматқа және қашықтан зондтау технологиясына ауыстыру қажет. Ал бізде көптеген су қоймаларында тіпті гидрологиялық бекеттер де жоқ", — дейді депутат.

Сенатор қазір су тапшылығының өсуі жағдайында көптеген елдер су ресурстарын басқарудағы саясатын өзгертіп, осы саладағы мемлекеттік бақылауды күшейтіп жатқанын алға тартады.

Оның айтуынша, мұндай елдерде су ресурстарын басқарудың бірыңғай мемлекеттік вертикалы құрылған, су шаруашылығының мамандандырылған министрлігі (агенттігі) ұйымдастырылған.

"Бізде су мәселесімен 6 министрлік, жергілікті атқарушы органдар және "Самұрық-Қазына" Акционерлік қоғамы айналысады. Халықаралық сарапшылардың пікірінше, Қазақстандағы су дағдарысы су ресурстарын басқару дағдарысының салдарынан болып отыр. Жалпы, біз мемлекеттік органдардың санын көбейтуге қарсымыз, бірақ су шаруашылығын басқаруда үнемдеуге болмайды. Саланың стратегиялық маңыздылығын ескере отырып, Қазақстанда су ресурстарын интеграцияланған басқару жүйесін қамтып, еліміздің су қорын жоспарлау, бақылау және ұтымды пайдалану мақсатында бірыңғай мемлекеттік саясат жүргізетін дербес су шаруашылығы ведомствосын құруды ұсынамыз", — деді депутат.

Бұған дейін кеңестік және тәуелсіз Қазақстанның Су шаруашылығы министрлігін 20 жыл басқарған Нариман Қыпшақбаев Экспресс К тілшісіне сұхбат беріп, трансшекаралық өзендердің тартылуына байланысты пікірін және бұл саланың өз министрлігі болуы керектігін айтқан еді.