Шеберліктерін шыңдады
Қазалы аграрлы-техникалық колледжінде «Үздік жас өндірістік оқыту шебері – 2020» байқауы өткізілді. Жастардың мамандыққа сай терең білімдерін және жаңа техника мен технологияларды игеруде шығармашылықпен қолдана білуін анықтау, өзара бәсекелестікті арттыруға бағытталған дода «Менің жетістіктер портфолиом», «Мен – шебермін», «Панорамалық сабақ», «Менің шығармашылық қоржыным» кезеңдерінен тұрды. Оған 11 үміткер қатысып, өздерінің қабілет-қарымын көрсетті.Байқаудың қорытындысында аға шебер Қуат Құланбайұлы өндірістік оқыту шеберінің жұмысына жеке-жеке тоқталып, жеңімпаздардың есімін атады. Сонымен бірінші орынды тамақтандыруды ұйымдастыру мамандығының шебері Гүлнәз Қарасай, екінші орынды Автокөліктерге техникалық қызмет көрсету, жөндеу және пайдалану мамандығының шебері Ержан Аденов, үшінші орынды электрондық есептеу және бағдарламалық қамтамасыз ету мамандығының шебері Нұрсұлтан Ахметжан иеленді. Белсенділігімен көзге түскен Бауыржан Жалтайға «Үздік өндірістік оқыту шебері», Жастілек Нұржігітке «Өнертапқыш өндірістік оқыту шебері» номинациясы берілді
Байқауға қатысушыларға колледж әкімшілігінің марапаты табысталды.
Нұржан ІЛИЯСОВ,
Қазалы аграрлы-техникалық колледжінің
өндірістік оқыту шебері
