2023 жылдың 1 шілдесінен бас­тап 31 желтоқсанына дейін бір қорап темекінің ең төменгі бағасы 710 теңге болады. 2024 жылдың 1 қаңтарынан бастап табак өнімдерінің құны ең кемі 770 теңге болып бекітілмек. Темекі ба­ға­сының өсуіне мына факторлар әсер еткен:

Бұйрықтың толық мәтінімен Ашық үкімет порталында таны­суға болады. Бұйрық мәтіні 19 мамырға дейін қоғам талқысына ұсынылды.

Еске салайық, биыл 1 қаңтар­дан бас­тап бір қорап темекінің минималды бағасы 650 теңге болған еді.

Сонымен қатар, алкоголь өнімдері­нің де бағасы өседі. Қазіргі бағалар 30 қыркүйекке дейін сақталады. Үкімет 1 қазан­нан бастап бағаны арттыруды көздеп отыр. Мысалы, арақ пен алкогольді ішімдіктердің ең төменгі бағасы литріне 1980 теңге болса, 1 қа­заннан бастап литрі 2100 теңгеге тең болады. Қазір 2930 теңге тұратын коньяк пен бренди қазаннан бастап 3110 теңгеге саудаланады. Жоба автор­­ларының айтуынша, бұл бастама елде алкогольді сусындарға деген сұранысты азайтуға тиіс. Abbeycare group мәліметіне сүйен­сек, 2022 жыл­дың қорытындысы бо­йынша Қазақстан арақты ең көп ішетін елдер қатарына енген. Олар ел­дегі ер азаматтардың 10 пайызы, ал әйел­дердің 1,5 пайызы ал­ко­гольге тәуелді деген пайым жасаған.

Energyprom ұсынған дерекке зер салсақ, соңғы бір жыл ішінде темекі өнімдеріне деген сұраныс 11 пайызға артыпты. Биыл қаңтар-сәуірде елде 5,1 млрд темекі және сол сияқты табак өнімдері өндірілген. Бұл былтырғы көрсеткіштен 4,8 пайызға төмен. Бірінші тоқсан­ның қорытындысы бойынша, жергілікті компаниялар темекі пен папиросқа деген сұранысты 79,7 пайызға (былтыр 80,6 пайыз­ға) қанағаттандырған. Импорт көлемі 20,3 пайызды құрапты.

Сондай-ақ Қазақстан 19,3 пайыз рес­сурсты немесе 882,9 млн сигарет пен табак өнімдерін экспортқа шығарған. Бұл 2022 жылғы көрсеткіштен 36,9 пайыз­ға көп. Ішкі нарықтағы сату қарқыны 10,1 пайызға, 3,7 млрд-қа дейін азайыпты.

2022 жылы әрбір үй орта есеппен табак өнім­деріне 44,8 мың теңге жұмсаған. Өңірлік бөліністе Павлодар облысы ең көп шығынға ұшыраған. Аталған өлкеде әр үй 83,1 мың теңгені темекі сатып алуға жұмсаған, тиісінше жылдық өсім көрсеткіші – 13,3 па­йыз. Одан кейінгі орында – Солтүстік Қазақстан (77,2 мың теңге, +9,6 па­йыз) және Шығыс Қазақстан облыс­тары (71,9 мың теңге, +24,8 пайыз). Темекіге ақшаны ең аз жұмсаған аймақ – Шымкент екен. Онда әрбір үй жылына 8,8 мың теңгеге темекі сатып алған, сәйкесінше 12 айлық өсім 14,2 пайызды құраған.

Мамандар былтыр алкогольді өнім­дерге деген сұраныстың да аз бол­мағанын айтады. Жыл бойына 756,1 млн литр сыра, 43,3 млн литр шарап және 140 млн литр қуаттылығы жоғары алкогольді өнім (арақ, коньяк, спирт) сатыл­ған. Жалпы, өткен жы­лы алкоголь өнімдерінің бағасы 14,8 пайыз­ға қымбаттапты. Өнімдер ішінде сұра­нысқа ең аз ие болған түрі – сыра. Соған қарамастан ішімдіктің бұл түрі басқалармен салыстырғанда аса қатты қымбаттаған (18,9 пайызға).