Қазақтың сан түрлі ұлттық аспаптары мен жыраулық ше­берлігін, әлемге әйгілі клас­сикалық өнермен бірге скрипка, күйсандық, баян сияқты музыкалық құралдарды толықтай меңгеріп, куәлік алған аудандық Қорқыт Ата атындағы балалар музыка мектебінің түлектері де білімдерін ұзақ жылдар бойы санада жаңғыртатыны анық. Өйткені олар қабылдау қабілеті жоғары жас­та 5 жыл бойы бойларына рухани өнерді сіңіре білді. Ал өткен аптада оқу ордасының 50-ші түлектері атанған оларға мектеп бітіру кеші ұйымдастырылып, куәлік табысталды. Оған аталмыш мектептің директоры Сәукен Әліш, білім саласының мамандары мен ата-аналар қатысты.

Алдымен сахнаға Қазақстан Рес­пуб­ликасының Туы әкелінді. Оны көтеру құрметі мектеп мақ­та­нышы, облыстық, рес­публикалық, халық­аралық бай­қау­лардың жеңім­пазы Дәулет Досқалиге бұйырды. Бұдан соң С.Әлмәмбетұлы бітіру­шілерді айтулы мерекелерімен құт­тықтады.

– Бүгін осы өнер ордасын тәмамдаған 52 оқушыға мектеп бітір­гендігін айғақтайтын куәлік табыстап, өнер әлеміне шығарып салғалы отырмыз. Сондай-ақ оқу жылдарында талантымен тамсандырып, үлгерімі үздік болған 8 түлек “Үздік куәлік” иесі атанды. Болашаққа деген қадамдарыңызға сәттілік, ақ жол тілеймін, – деп құжаттарын үлестірді.

Бұдан кейін түлектер өз өнерлерін көрсетті. Асылхан Еркебұлан, Эльмира Тілеуберген, Саяжан Оразхан, Дәулет Досқали, Динара Құдайберген сияқты өнерпаздар мен хореографтар, қобыз мамандығының лауреаттары, баянистер мен фортепиано түлектерінің орындауындағы қойы­лымдардан олардың қимастық сезімі анық байқалды.

Кеш соңында музыка мектебінің бірінші сынып оқушылары аға буын­ға жүрекжарды тілектерін айтты. Ізін ала мемлекеттік Ту мен білім ордасының алтын кілтін табыстау рәсімі өтті. Соңғы қоңырау соғылып, “Қоштасу вальсі” орындалды.