Өнер өлкесіндегі өрелі істер

Кез келген елдің рухани танымын, көңіл көкжиегін кеңейтетін оның мәдениет саласы екені белгілі. Жалпы, Қазалы ауданының тағылымды тарихы, әдебиеті мен мәдениеті туралы жазып та, айтып та келеміз. Сонау ықылым замандардан бас­тау алатын осы сала жыл өткен сайын жанданып, қоғамдағы маңызын арттырып отыр. Оған ел ағалары мен құзырлы орындардың кеңінен қолдау көрсетіп жатқанын да атап өтпесек болмас. Сөзіміздің дәлелі ретінде айтсақ, ауданда қазіргі таңда мәдениет және тілдерді дамыту бөліміне қарасты мәдениет орталығы, 26 кітапхана, Ғ.Мұратбаевтың мемориалдық музейі, тарихи-өлкетану музейі және кент, қала, ауылдық округ әкімі аппараттарына қарасты 6 мәдениет үйі мен 17 клуб, барлығы 52 мекеме халыққа қызмет көрсетеді. Олардың барлығы жыл сайын жаңартылып, түрлі керекті құрал-жабдықтармен жабдықталып отыр.

Мәселен, осы жылдың өзінде Бірлік, Кәукей ауылдық клубтарына музыкалық аппаратура, аудандық мәдениет орталығына оркестр киімдері сатып алынған.

Қазіргі таңда облыстың басқа аудандарымен салыстырғанда Қазалыдағы ауылдық клуб пен мәдениет үйінің барлығында дыбыс күшейткіш аппаратуралары жаңаланып жатыр.

Ал, өткен жылы Жалаңтөс батыр ауылына 150 орындық типтік жобадағы клуб құрылысы салынып, ел игілігіне пайдалануға берілгені баршаға аян.

Сонымен қатар, биылғы жылы аудан орталығынан 600 орындық мәдениет үйінің құрылыс жұмыстары, Ақсуат ауылынан 150 орындық жаңадан типтік ғимарат салу үшін аудандық бюджеттен жоба-сметалық құжаттарын дайындауға 7,2 млн теңге қаржы бөлініп, тиісті жұмыстары жүргізілуде.

Президенттің «Болашаққа бағдар: рухани жаңғыру» атты мақаласы аясында мәдениет саласына қарасты кәсіпорындар мен мәдениет ошақтарында қайта жаңғырту тапсырмалары беріліп, жүйелі жұмыстар атқарылуда.

Жаңа жыл басталғаннан бері Астана қаласының 20 жылдығын, Қызылорда қаласының 200 жылдығын, Қазалы ауданының 90 жылдығын, көршілес Арал, Қармақшы аудандарында Қазалы ауданының мәдениет және өнер күндерін, Ғ.Мұратбаевтың мемориалдық музейінің құрылғанына 50 жыл толуына, КСРО мәдениетінің үздігі, ҚР Мәдениет қайраткері Орақ Баубековтің 70 жасқа толуына орай түрлі деңгейдегі мәдени көпшілік шаралар ұйымдастырылуда.

Жоғарыда айтқан Елбасының бағдарламасына сәйкес «Қазақ­станның киелі жерлері» жобасы аясында жалпы халықтық маңызы бар қасиетті орындар тізіміне Жанкент қалашығы мен Жанқожа батыр мазары енгізілсе, өңірлік маңызы бар қасиетті орындар тізіміне Ғанибай, Нұралы, Қожаназар ишан мешіттері, Ғанибай үйі, Кескен күйік қалашығы, Мүсірәлі әулие кесенесі, Қосым қожа бейіті ұсынылыпты. Бұл да болса, өшкеніміздің жанып, өлгеніміздің тірілгені деуге толық негіз бар.

«Бәрін айт та, бірін айт» демекші, Қазалы қаласындағы республикалық санаттағы ес­керткіш Ғанибай үйіне респу­бликалық бюджет есебінен қайта жаңғырту жұмыстары жүргізіліп жатқаны көңілге қуаныш ұялатады.

Алдағы уақытта Қазалы ауданында жаңадан салынатын «Мекемелер үйі» алаңында Әйтеке би бабамызға еңселі ескерткіш орнату жоспарланып, тиісті жұмыстары атқарылып жатқанының өзі мәдениет саласына деген үлкен қолдау деп білеміз.