15 сәуір - Шығыстың жарық жұлдызы, Қазалы топырағының даңқты перзенті, қоғам қайраткері Ғани Мұратбаевтың өмірден озған күні. Қайтқан күніне байланысты Ғани Мұратбаевтың мемориалдық музейі қалалық мәдениет Үйімен бірлесіп, қалалық мәдениет Үйінде «Мәңгілік жас Ғани» атты еске алу рәсімін өткізді. Еске алу рәсімі ақын Ж. Мәкеналының «Мен Ғанимын» атты өлеңіне дайындалған прологпен басталды.

Шараға Қазалы қаласы әкімінің бас маманы Ө. Өтегенов, «Жастар ресурстық орталығы» аудандық бөлімінің директоры О. Ахметов, «Қазалы» газетінің жауапты хатшысы, ақын, облыстық Ғани Мұратбаев атындағы сыйлықтың алғашқы иегері Е. Табынбаев, зейнеткер –ұстаз Қ. Саниязов қатысып, Ғанидың жалынды жолымен жігерлі істері туралы жастарға ой салар келелі әңгімелер айтты. Аудан орталығындағы «Қожаназар Ишан» мешітінің молдасы Сәндібек Ерназаров Ғани рухына арнап құран бағыштады. Шараны музей директоры Р. Асанова жүргізіп, Ғанидың өмірі мен қоғамдық қызметіне шолу жасады. Шара соңында 2012 жылы Ғани Мұратбаевтың туғанына 110 жыл толу құрметіне түсірілген «Ғани» атты деректі фильм көрсетілді.