Кентке көрік қосқан «Көркем – Сервис»
Бейсенбі күні «Қазалы – Көркем – Сервис» ЖШС жаңа ғимаратының ашылу салтанаты өтті. Оған аудан әкімі М.Ергешбаев бастаған ел ағалары қатысты. Алқалы жиында сөз алған аудан басшысы құттықтау сөз сөйлеп, іргелі ұжымның тындырымды тірлігіне, ауданның өсіп-өркендеуі жолындағы үлгілі жұмыстарына тоқталды.– Барлық көрсеткіштер жағынан облыста Қазалы ауданы алдыңғы қатарда. Бізде 5 мыңға жуық кәсіпкерлер қарқынды жұмыс істеп жатыр. Оған қоса аймақ басшысы «Кіші кәсіпкерлікті қолдау жылы» деп жариялағаны өздеріңізге мәлім. Және де тағы екі жыл қосылып, енді үш жыл қатарынан кәсіпкерлерге жан-жақты көмек жасалынатын болады. Биылдың өзінде 32 миллиард теңге қаржы институттарынан, бюджеттен бөлінген. Бұл үлкен қомақты қолдау деп ойлаймын. Жалғыз Әйтеке би кентінің орталығында емес, барлық елді мекендерде кәсіпкерлік бағытының даму қарқыны өте жоғары. Осы ашылғалы жатқан нысан мемлекеттің, аймақ басшысының қолдауы екені сөзсіз.
Кенттің ішіндегі тазалықтың сақталуына аталмыш ұжымның еңбегі зор. Барлығы қажырлы істеріңіздің нәтижесі деп білемін, – деді аудан әкімі.
Мұнан соң, аудандық ардагерлер ұйымының төрағасы О.Бекбанов сөз алып:
– Соңғы жылдары Әйтеке би кентінде түрлі нысандар пайдалануға беріліп, аудан ажарына сән қосып келеді. Соның бірі осы ғимаратты айтуға болады. Қазалыдан түрлі пайдалы қазба шықпағанымен, біздің ауданның кәсіпкерлік саласы өте қарқынды. Ел ішінде «екінші Түркістан» деген атқа ие болуы да бекерден-бекер емес. Бұл да болса аудан азаматтарының іскерлігін, жан-жақты ізденісін көрсетеді, – деді.
Бұдан кейін жаңа ғимараттың лентасын аудан әкімі, «Рза» АҚ президенті, облыстық қоғамдық кеңес төрағасы С.Имандосов, аудандық ардагерлер ұйымының төрағасы О.Бекбанов қиып, қатысушылар бөлмелерді аралап көрді.
Айта кетерлігі, «Қазалы – Көркем – Сервис» ЖШС 2014 жылдан бері Әйтеке би кенті бойынша санитарлық-тазалық, абаттандыру, көркейту-көгалдандыру жұмыстарын жүргізеді. Кенттегі 186 көшенің 84 көшесінің, шет аймақтардың, қоғамдық демалыс орындарының тазалығымен айналысады.
Есет ТАБЫНБАЕВ
