Су мәселесі мен егін жоспары талқыланды

Осыған байланысты ауданда алдағы вегетациялық кезеңге жан-жақты дайындық жүргізу, егін шаруашылықтарының тұрақтылығын сақтау және суды тиімді пайдалану мәселелері күн тәртібіне шығарылды. Осы мақсатта жуырда ауданда облыстық және салалық мекемелердің қатысуымен маңызды мәжіліс өтті.

Жиынға Қызылорда облыстық ауыл шаруашылығы және жер қатынастары басқармасының басшысы Талғат Дүйсебаев, «Қазсушар» РМК Қызылорда филиалы директорының міндетін атқарушы Нәжмадин Шамұратов, Су ресурстарын реттеу, қорғау және пайдалану жөніндегі Арал-Сырдария бассейндік су инспекциясының басшысы Зейнулла Қазтоғанов, «Қызылорда крахмал-сірне зауыты» ЖШС директоры Шухрат Құрбанов және «Аграрлық Несие Корпорациясы» АҚ облыстық филиалының өкілі Нұржан Жаналиев қатысты.

Аудан әкімі Алмасбек Есмаханов төрағалық еткен алқалы жиында суармалы егіншілікпен айналысатын шаруашылықтардың маңызды мәселелері, биылғы егін егу жұмыстарынан алынған нәтижелер және келер жылға жоспарланған міндеттер жан-жақты талқыланды. Ол су тапшылығы жағдайында шаруаларға түсіп отырған жүктеменің артып отырғанын айтып, аудан деңгейінде жасалып жатқан дайындық шараларына тоқталды.

Күн тәртібіндегі мәселелер бойынша сөз алған басқарма және сала басшылары егістікті суармалы сумен қамтамасыз ету тетіктері, Сырдариядағы су тапшылығының себептері, сондай-ақ егіс алқаптарын әртараптандыру қажеттілігі жөнінде ұсыныстарын жеткізді. Әсіресе күріштің орнына су аз қажет ететін балама дақылдарды – жүгері, мақсары және басқа да тиімді егіс түрлерін енгізудің маңыздылығы атап өтілді.

Сонымен қатар «Жалаңтөс батыр» ЖШС директоры Қасқырбай Әлімбай аудан шаруашылықтарындағы қазіргі жағдай мен олардың алдағы маусымға дайындығы жөнінде ой бөлісті.

Жиынды қорытындылаған аудан әкімі Алмасбек Әбілқасымұлы Мемлекет басшысының тапсырмасына сәйкес су үнемдеу технологияларын кеңінен енгізудің маңызын ерекше атап өтті. Ол өнімділікті төмендетпеудің басты жолдарының бірі – егіс алқаптарын әртараптандыру екенін айтып, көктемгі дала жұмыстарына қажетті тыңайтқыш, тұқым және техниканы уақытылы дайындауды міндеттеді. Арналарды тазалау, су көздерін тиімді пайдалану сынды мәселелер үнемі бақылауда болуы керектігін жеткізді.

Аудан басшысы жиынға арнайы келіп, шаруалармен түсіндірме жұмыстарын жүргізген сала өкілдеріне алғысын білдіріп, барлық шаруашылық басшыларын нақты жоспар бойынша бірлесе әрекет етуге шақырды. Аграрлық саланың тұрақтылығын қамтамасыз ету – ортақ міндет екенін баса айтты.