Осы Инновациялық жобаларды сынамалауға арналған эксперименттік режимдерге бастама жасау қағидалары Қазақстан Республикасы Кәсіпкерлік кодексінің 241-10-бабының 5-тармағына сәйкес әзірленді және "Қазақстан Республикасының Ұлттық Банкі туралы" және "Қаржы нарығы мен қаржы ұйымдарын мемлекеттік реттеу, бақылау және қадағалау туралы" Қазақстан Республикасының заңдарына сәйкес айрықша реттеу режимі шеңберінде енгізілетін қаржы ресурстарын шоғырландыруға және (немесе) төлем қызметтеріне байланысты қаржы саласындағы қызметте инновациялық жобаларды сынамалауға арналған эксперименттік режимдерді қоспағанда, инновациялық жобаларды сынамалауға арналған эксперименттік режимдерге бастама жасау тәртібін айқындайды.

Инновациялық жобаларды сынамалауға арналған эксперименттік режимді енгізуге инновациялық жүйе, кәсіпкерлік, ғылыми және (немесе) ғылыми-техникалық қызмет субъектілері, өзге де жеке және заңды тұлғалар бастама жасай алады.

Эксперименттік режим 3 (үш) жылдан аспауға тиіс және сот шешімімен әрекетке қабілетсіз деп танылған адамдарды және өздеріне қатысты келісімді заңды өкілдері білдіретін 18 (он сегіз) жасқа толмаған кәмелетке толмағандарды қоспағанда, эксперименттік режимге қатысуға келісім білдірген адамдардың белгілі бір тобына қатысты енгізіледі.

Инновациялық жобаларды сынамалауға арналған эксперименттік режимдерге бастама жасау туралы өтінішті бастамашы осы Қағидаларға қосымшаға сәйкес нысан бойынша ресімдейді және эксперименттік режимге қатысатын адамдардың келісімін ұсына отырып, "Ұлттық инновациялық жүйе" бірыңғай терезесі" интернет-порталы арқылы уәкілетті органға енгізеді.

Бастамашы өтінішті жұмыс күнінен тыс уақытта берген жағдайда ол одан кейінгі жұмыс күні тіркеледі.