Татарстаннан келген делегация Қазалыда болды
Жақында Қызылорда облыстық татар этномәдени бірлестігінің 30 жылдығына орай Дүниежүзілік татарлар Конгресі Ұлттық Кеңесінің мүшесі, Татарстан Республикасының еңбек сіңірген ғылым қайраткері Альберт Бурханов бастаған делегация Қазалы ауданында болды.Делегация мүшелері алдымен Қазалы қаласындағы М. Горький атындағы №16 мектеп-лицейде Ұлы отан соғысының ардагері, жерлесіміз, Фуат Сәйфелмөлековке арналған ескерткіш тақтасының ашылу салтанатына қатысты.
Салтанатты шарада аудандық ішкі саясат бөлімінің басшысы Қайрат Әбубәкірұлы, туған жері үшін жанын пида еткен батырдың есімі ешқашан ұмыт қалмайтындығын жеткізіп, жиылғандарды ескерткіш тақтайшаның ашылуымен құттықтады.
Мұнан соң Дүниежүзілік татарлар Конгресі Ұлттық Кеңесінің мүшесі Альберт Бурханов, Республикалық Қазақстан халқы Ассамблеясы төрағасының орынбасары Тауфик Каримов және Қазақстан халқы Ассамблеясының мүшесі Галия Гизатуллина сөз сөйлеп, батырдың ерлігі мен есімі ұлықталып жатқан шараны ұйымдастырушыларға алғыстарын жеткізді.
Сонымен қатар, делегация мүшелері Қазалы қаласындағы орталық кітапхананың алтын қорын көріп, тамыры тереңнен сыр шертетін қасиетті өлкенің тарихыменде танысты. Сондай-ақ, қазақтың қара домбырасымен шырқалған әдемі әуен мен күмбірлеген күйге де қанық болды.
Мұнан кейін делегация мүшелері Шығыстың жарық жұлдызы атанған Ғани Мұратбаевтың мемориалдық мұражайына барып, жалынды жастар жетекшісі Ғани Мұратбаевтың аз ғұмырында жасаған еңбек жолымен танысты.
"ҚАЗАЛЫ" ақпарат
