Кешегі Қарасақал Ерімбет пен Жәмет, Төремұрат жыраудың, Едіге мен Рүстемдей ақтаңгер ақындардың заңды ізбасары бұл күндерде арамыздан табылады. Соның қатарында қазіргі жас толқынның көшін бастап, парасатты поэзияның алдыңғы сапында жүрген жалынды жастың бірі – Ақжол Түменбай десек жарасымды.

Ақтан батыр ауылында туып, қазіргі таңда Семей қаласында білім алып жатқан жампоз жігіт жуырда ғана Қарағанды облысы, Қарқаралы ауданында өткен ақиық ақын Қасым Аманжоловқа арналған «Сен неткен бақытты едің, келер ұрпақ...» атты республикалық мүшәйраның бас жүлдесін қанжығасына байлады.

Еліміздің әр түкпірінен келген жас таланттардың ішінен шашасына шаң жұқтырмай дара шыққан жерлесіміздің бұл жүлдесі жалғыз Қазалы ауданының емес, аймағымыздың абыройын көтеруге қосқан елеулі үлесі десек қателеспейміз.

Бұған дейін түрлі облыстық, республикалық додаларда топ жарып, заманауи әндерге сөз жазып, халық ықыласына бөленіп жүрген ақынның алдағы уақытта да абырой биігінен көріне беруіне зор сенім білдіреміз.