Қала іргесіндегі Наурыз және Махамбет елді мекендерін газдандыруға арналған жоба-сметалық құжат дайындалса, Қармақшы ауданының Төретам және Ақай, Шиелі ауданының Алғабас, Ақмая, Қодаманов елді мекендерін газдандыруға құжаттама әзірленуде.

– Негізі жоспар бойынша облысқа 13 АГРС салу қарастырылған. Қазір Арал, Қазалы, Байқоңыр, Жаңақорған, Шиеліде салынып тұр. Жалағаш пен Тереңөзекке біреуі орнатылса, Қызылорда қаласында екеуі жұмыс жасап тұр. Қазір Сексеуіл кентіне, Шиелідегі Шоқай ауылына салуды жоспарлап жатырмыз. Өйткені, ол жерлерде халық саны көп, басқа ауылдар жақын орналасқан. Облыс орталығында 2 жылу орталығы, 190 шақырым жылу құбыры бар. Биыл бу қазандықтары мен 7,8 шақырым жылу құбыры күрделі жөндеуден өткізілді, – деді облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жоламанов.

Жылу маусымы биыл мерзімінен ерте берілді. Дегенмен, тұрғындар арасында жылудың, газдың қысымына байланысты көңілтолмаушылық бар.

– Қалада екі АГРС бар. Екеуі бір-біріне қосылмаған. Сол жағалауда газдың қысымының азайып кететіні сондықтан. Қысым әртүрлі болғандықтан қалада да мұндай мәселе кездеседі. Бірақ тұрғындар жылу маусымының алдында құбырын, мұржаларын тазарту секілді жұмыстарды тұрақты жүргізбейді. Оның да кесірі тиеді. Ал орталықтандырылған жы­луға қосылған үйлердің өжірелері суға толып қал­ғандықтан болады. Бұл бағытта биыл біраз жұмыс атқарылды. 32 көпқабатты тұрғын үй жаңғыртудан өтті, – деді Ерлан Жоламанов.

– Облыс орталығына көгілдір отын келгеніне он жылдан асты. Әдепкіде, газ есептегіш құралдарына «Смарт карта» қолданылған. Оның қызмет көрсету мерзімі аяқталды. Қазір механикалық есептегіш түріне ауыстырып жатырмыз. Оның артықшылығы көп. Біріншіден онлайн төлем жасауға ыңғайлы. Екіншіден, әр айдың басында бағдарламаны жаңарту үшін жасалатын бұғаттауға жол берілмейді, – деді «ҚазТрансГаз Аймақ» АҚ ҚОФ апатты-диспетчерлік қызметінің басшысы Базарбек Ерімбетов.