Бүгін Сеул-Алматы бағытындағы KС-910 рейсімен 2018 жылғы Пхенчхандағы ХХІІІ қысқы Олимпиада ойындарының қола жүлдегері Юлия Галышева, соынмен қатар Павел Колмаков, Денис Тен, фристайл могулдан Қазақстан ұлттық құрама командасының жаттықтырушылары, шаңғы акробатикасынан Қазақстан ұлттық құрама мүшелері Алматы әуежайына ұшып келді. Мұнымен қатар, Денис Тен сәтсіздіктен кейінгі әсерін бөлісті, деп хабарлайды Baq.kz ақпарат агенттігі спорттық ХАБ-қа сілтеме жасап.

«Әрине, бәрі де аяқ асты болды. Маған тек өзімнің командам емес, бүкіл қазақстандықтар мен жақын адамдарым қолдау көрсеткенде шын қуандым. Оңтүстік Кореяға арнайы келіп, Алға, Қазақстан деп бізге жанкүйер болған адамдарға алғыс айтқым келеді, олардың қолдауы бізге өз септігін тигізді. Алған әсерім өте керемет, басқа жарыстардан қарағанда, бұл жарыс өте ерекше болды. Әрине, біз алтын аламыз деп үміттенген едік, алайда мақсат үздік үштікке кіру болатын. Ойымызды іске асырып, риза болып отырмыз. Мен үшін қола – алтын медальға теңеледі», - деп Юлия Галышева Олимпиададан алған әсерін бөлісті.

«Бұл менің үшінші Олимпиадам. Мұзға оралып, өз бағдарламамды орындағаныма өте қуаныштымын. Әрине, қиын маусым болғандықтан, орын алуым екіталай болды. Бірақ мен еңсемді түсірмеймін, жаттығуымды жалғастырамын, алайда, менің әлем чемпионатына қатысатыным әлі белгісіз. Егер де мен оған қатыспасам, Қазақстаннан ұлдар арасында мұзға шығатындардан ешкім болмайды. Жалпы, Олимпиада мен үшін тез өтіп кетті, бірақ та маған қызықты әрі пайдалы болды. Бұл ойындарды сөзбен айту мүмкін емес. Бұл шараға қатысқан үшін өзімді бақытты сезінемін», - деді Денис Тен.