Үкімет отырысынан кейін Дін істері және азаматтық қоғам министрі Нұрлан Ермекбаев діни көзқарасты ұстанатын ата-аналардың жеке мектеп ашуға мүмкіндігі бар екенін айтты, деп хабарлайды Baq.kz тілшісі.

Отырыстан шыққан министрді журналистер бірден сұрақтың астына алды.

«Ақтөбедегі ата-аналар Мәжіліс депутаты Бақытбек Смағұлмен кездесу барысында жеке діни мектеп ашу жөнінде ұсыныс айтыпты. Осы ұсыныс қаншалықты орынды?» — деді журналист.

Алдымен, Нұрлан Ермекбаев елімізде арнайы діни білім беретін мекемелер бар екеніне қарамастан, республикада жеке мектеп ашуға болатынын жеткізді.

«Бізде діни білім беретін медреселер бар. Қалған білім беру жүйесі діннен бөлінген. Ол туралы заңда жазылған. Алайда қазіргі таңда жеке мектеп ашуға да болады. Мысалы, қыздар мен ер балаларға арналған. Олар жеке-жеке оқуы қажет. Ондай мектептерді ашуға барлық жағдай жасалған», — деді министр.

Осы орайда ведомство басшысы аталған білім ордасының қарапайым мектептерден несімен ерекшелетінін түсіндірді.

«Біз «Азаматтарымыз осындай жеке мептепті ашуға қаншалықты дайын?» деген сұрақты қарастырудамыз. Ол мәселені талқылап жатырмыз. Бірақ ол мектеп, ҚР Білім және ғылым министрлігінің сертификациясынан өткен және діннен бөлінген болады. Ал мектептің ерекшелігі — мұнда қыздар орамалсыз жүре алады. Себебі, онда ұлдар жоқ. Алайда бұл мектеп діни білім бермейді. Жоғарыда аталған ұсынысты қолдайтын ата-аналардың өздері жиналып, демеушілер тауып, жеке мектептерді ашуға мүмкіндіктері бар. Ол үшін барлық жағдай жасалып отыр», — деді Нұрлан Ермекбаев.