Ауданда үй кезегінде тұрған тұрғындар үшін баспана салынуда
Өңірлік коммуникациялар қызметінде Қармақшы және Қазалы аудандық тұрғын үй коммуналдық шаруашылығы, жолаушылар көлігі және автомобиль жолдары бөлімдерінің басшылары тұрғын үй кезегінде тұрған азаматтарға үй беру, есепке қою бағытында атқарылған жұмыстарға есеп берді. Биыл Қармақшы ауданында 6 тұрғын үй салынды. Олар кезекте тұрған мұқтаж жандарға пайдалануға берілді. Аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Талғат Қатарбаевтың айтуынша, биыл Байқоңырда 50 пәтерлі 5 үйдің іргетасы қаланып, құрылысы келер жылы жалғасады. Нәтижесінде Төретам және Ақай ауылдарының үй кезегінде тұрған азаматтары баспанамен қамтылады.
Ал, Қазалы ауданының тұрғын үй коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы Марат Ситекен келер жылы ауданда 18 пәтерлі 6 тұрғын үй салынатынын мәлімдеді.
