Шежіреші есімі ұлықталды
Қазалыда ауданның құрметті азаматы, Ұлы Отан соғысының ардагері Өмірзақ Ахметовтің туғанына 100 жыл толуына орай аудандық жыршы-термешілер байқауы өтті. Әйтеке би кенттік клубында өткен «Жеңісті жақындатқан ардагер» атты байқауды аудандық мәдениет және тілдерді дамыту бөлімінің басшысы Болат Жолтаев ашып, еңбек ардагерінің өмірінен естеліктер айтты.Байқауға бүкілодақтың өнер фестивалінің және республикалық жыршы-термешілер байқауының бас жүлде иегері Қалабай Сүйінтаев, ақын-ұстаз Сағыныш Мұхитқызы және жыршы-термеші Жанболат Өмірзақ қазылық жасады.
Құрметті азаматтың есімін ұлықтауға арналған байқаудың қорытындысы бойынша Жанкент ауылының термешісі Болатбек Рсалиев бас жүлдені иеленді. Жүлделі бірінші орынды Ғ. Мұратбаев ауылынан Ахан Ербозов, екінші орынға Жалаңтөс батыр ауылынан келген Мағжан Оңғаров пен Кәукей ауылының жыршысы Кәмшат Көбекова ие болды. Жүлделі үшінші орын Қазалы қаласынан келген Едіге Айдаров пен Майдакөл ауылының тумасы Бақтияр Асановқа бұйырды.
Жыршы-термешілер байқауына қатысушылардың барлығына арнайы дипломдар мен естелік сыйлықтар табыс етілді. Байқау соңында Қазалы ауданының құрметті азаматы Сержан Қожа Берденұлы тағылымды шарада өнер көрсеткен өнерпаздарға ақ батасын берді.
«ҚАЗАЛЫ» ақпарат
