Гүлсайрам Алшынқызы 33 жыл үздіксіз бас­тауыш сыныпта еңбек еткен майталман ұстаз, білімді маман. Мұғалім ісі сырттай қарапайым болғанымен – тарихтағы ең ұлы істің бірі.Ол ұлтымыздың саналы бірнеше жүздеген ұрпағының көзін ашқан, сауаттандырған, білім нәрімен сусындатқан беделді мұғалім. Қарапайымнан кереметті көре білетін ойы ұшқыр, қиялы жүйрік, мықты идеялардың авторы. Еңбекке жанын салатын, баланы оқытудағы әдісі мол, тәсілі тиімді істің маманы. Осы бағытта өткізген сабақтары, тәрбие сағаттары, ата-аналармен өткізген түрлі шаралары өз әріптестері мен көпшіліктің көңілінен шығатын. Оның жас мамандарға өзінің кесімді пікірлерімен, өмірлік іс-тәжірибесімен бөлісіп отыратыны көпшілікке мәлім. Қазіргі таңға дейін мектебімізде жас ұрпаққа сапалы білім, саналы тәрбие беруде өнегелі үлгісімен, жаңашылдық жолымен, адамгершілік қасиетімен, қоғамдық жұмысымен ұстаздық жолын көрсете отырып мектебімізде бастауыш сыныпта сабақ беріп келеді.

Ел игілігі жолында атқарған еңбегі елеусіз қалған жоқ. Бірнеше аудандық, облыстық, республикалық білім байқауларының жүлде­герлері. «Алтын белгі» иелерін дайындаудағы қосқан үлесі үшін Астана қаласына төрт мәрте жолдама иеленген.

Гүлсайрам апайға бала беремін деп келген ата-аналар легі көптеп саналады. Жас ұрпақты білімге, білуге үйретіп жүрген, жауапты істің шебері – Гүлсайрам Алшынқызын мереке қарсаңында құттықтаймын! Мәртебеңіз артып, шәкірттеріңіз білім шыңына шарықтап абыройлары арта берсін. Өскелең ұрпақ тәрбиелеуде шығармашылық табыс тілеймін. Қызығы мен шыжығы қатар жүретін ұстаздық жолыңыз тек өрлеу мен өсуге бастасын.

№266 мектеп-лицей

бастауыш сынып мұғалімі