Биыл шаруаларға екі есе көп несие берілді
Мемлекеттік бюджеттен ауыл шаруашылығы саласына бөлінген қаржы 28%-ға қысқарды. Биылғы жылдың қаңтар айында мемлекеттік бюджеттің ауыл, су, орман және балық шаруашылығына, сондай-ақ ерекше қорғалатын табиғи аумақтарға, қоршаған ортаны қорғауға және жануарлар дүниесін дамытуға жұмсалған шығыстары 11,8 млрд теңгені құрады. Бұл бір жыл бұрынғыдан бірден 27,8%-ға аз, деп хабарлайды inbusiness.kz finprom.kz-ке сілтеме жасап.Ал былтырғы қаңтар-желтоқсанда сала бойынша мемлекеттік бюджет шығыстары 7,4%-ға өсіп, 717,9 млрд теңгені құрады. Мемлекеттік бюджет шығыстарының жалпы көлемінде агроөнеркәсіптік кешеннің үлесі 3,8%-4,6% аралығында ауытқиды. Агроөнеркәсіптік кешен мемлекеттің азық-түлік тәуелсіздігі мен қауіпсіздігін қамтамасыз етуде шешуші рөл атқарады. Биылғы жылдың қаңтар-ақпан айларында Қазақстан Республикасының екінші деңгейлі банктері ауыл шаруашылығы саласына 37,1 млрд теңгеге несие берді, бұл өткен жылмен салыстырғанда 2,3 есе көп. Жалпы, 2021 жылдың қаңтар-желтоқсан айларында сектордағы несиелер көлемі 65,1%-ға өсіп, 279,3 млрд теңгені құрады.
