Президент жолдауы халқымызға рухани медеу
Мемлекет басшысы Қасым-Жомарт Тоқаев кеше қазақстандықтарға жасаған кезекті жолдауында халықты Жаңа Қазақстанды құруға бір кісідей жұмылуға шақырды. «ЖАҢА ҚАЗАҚСТАН: ЖАҢАРУ МЕН ЖАҢҒЫРУ ЖОЛЫ» деп аталатын жолдауда нақты жүзеге асырылатын саяси реформалардың жаңа бағдарламасы мен әлеуметтік-экономикалық бағытта атқарылатын іс-шаралар туралы айтылды.Мемлекет Басшысы мәжіліс пен мәслихат депутаттарының құзыреттілігін күшейтуді, елімізде Конституциялық сот құруды және қоғамдық түрлі санаттағы өкілдерден тұратын "Ұлттық құрылтай" құруды ұсынып, Конституцияға 30-ға жуық өзгеріс енгізу қажеттігін айтты. Қазақстанда жаңа үш облыс құрылады. Шығыс Қазақстан облысының Семей аймағында – Абай облысы, Қарағанды облысының Жезқазған өңірінде – Ұлытау, Алматы облысы аумағында Жетісу облысы құрылатын болады. «Мен азаматтарымыздың ертең емес, бүгін бақытты өмір сүргенін қалаймын. Ең бастысы – еліміздің егемендігі! Шын мәнінде, біз үшін Қазақстанның Тәуелсіздігі бәрінен қымбат» - деді Мемлекет басшысы өз Жолдауында.
Жолдаудағы нақты міндеттерді орындап, жаңа Қазақстанды құру жолындағы жаңаша реформаға атсалысу біздің де міндетіміз.
Төребек ИГІЛІКОВ,
Қазалы аудандық мәслихатындағы «AMANAT»
партиясы депутаттық фракциясының мүшесі
