Жоғары оқу орындары мен ҒЗИ интеграциясы не үшін қажет?

Қазақстанның жоғары оқу орындары мен ғылыми-зерттеу институттары кадрлар даярлау, зерттеулер жүргізу үшін бірлесе жұмыс істеуге тиіс. Осы тұрғыдан алғанда университеттер мен ғылыми-зерттеу институттарының мүмкіндіктерін біріктіру маңызды. Бұл жұмысты жүйелі түрде ұйымдастыру үшін ЖОО мен ҒЗИ арасында келісімдерге қол қойылды, - деп жазды министр.

Білім және ғылым министрі осы бағытта бірлескен жұмысты атқарған ұйымдар жақсы нәтижеге қол жеткізіп жатқанын айтты. Министрі Әл-Фараби атындағы Қазақ ұлттық университеті мен Биологиялық қауіпсіздік проблемаларының ғылыми-зерттеу институтының ынтымақтастығын үлгі етті. «Вирусология» атты жаңа бағдарлама әзірленіп, бірлескен диссертациялық кеңес құрылған. Сонымен қатар университет студенттері коронавирусқа қарсы вакцина жасаған ғалымдармен өзара байланыс орнатқан.

Жоғары оқу орындары мен ҒЗИ интеграциясы не үшін қажет және оның нәтижесі қандай болмақ?

ҒЗИ-ларда жұмыс істейтін жетекші ғалымдар жоғары оқу орындарына сабақ беруге тартылатын болады. Сондай-ақ олар студенттердің ғылыми жобаларына жетекшілік етеді. Қол қойылған келісімшарттарға сәйкес бірінші кезеңде бұл жұмысқа 300 ғалым қатысатын болды. Осы уақытқа дейін ҒЗИ-ларда жұмыс істейтін ғалымдар білім беру жүйесіне көп араласпады, дегенмен олардың студенттерге сабақ беруі маңызды.

Жоғары оқу орындары мен ҒЗИ бастапқы кезеңде кадрлар даярлау үшін 500 білім беру бағдарламасын әзірлейді. Ғылыми зерттеулердің нәтижелері білім беру процесінде қолданылатын болады. Сондай-ақ кадрларды даярлау бойынша бірлескен жұмыс жүргізіледі.

Магистранттар мен докторанттар ғылыми-зерттеу институттарына бара алады және олардың лабораториялары мен базасы олар үшін ашық болады. Келісімдер аясында Ұлттық ядролық орталықта, Ядролық физика институтында, Ұлттық биотехнологиялар орталығында, Биологиялық қауіпсіздік институтында және т.б. бірегей ғылыми зертханаларда тағылымдамадан өту туралы уағдаластық көзделген.

Сондай-ақ жүзден астам бірлескен диссертациялық кеңестер жұмысын жүргізеді, олардың құрамына жоғары оқу орындарының, ғылыми-зерттеу институттарының да қызметкерлері кіреді. Өкінішке қарай, осы уақытқа дейін ҒЗИ ғалымдары диссертациялық кеңестердің жұмысына аса араласпаған.

Е-lab ақпараттық жүйесін құру туралы шешім қабылданды. Осы жүйенің көмегімен ғылыми қызметкерлер еліміздің қай университетінде немесе институтында қандай зертхана бар екенін көре алады және алдын ала жазылып, олардың техникалық мүмкіндіктерін пайдалана алады. Университеттерде әртүрлі зертханалар бар және оларды толығымен пайдалану қажет.