Сырдария өзені арнасындағы мұз кептелістері салдарынан су деңгейі көтеріліп, Қазалы қаласындағы «Шағала» лагерінің жанындағы қорғаныс бөгетінен су асып, лагерьдің аумағына су жайылды. Осыған орай, су басу қаупінің алдын алу мақсатында арнайы техникалар арқылы топырақпен бекіту жұмыстары жүргізілуде.

Балаларды сауықтыру орталығы жаз мезгілінде жұмыс істейтіндіктен зардап шеккендер жоқ.

Бұдан бөлек, дария бойындағы су басу қаупі бар Сарыкөл, Бірлік, Өркендеу, Арықбалық, Көларық, Майдакөл ауылдық округтері бойынша тәулік бойы кезекшілік бекітіліп, қажетті қауіпсіздік шаралары қабылданды.

Қазіргі таңда аудан бойынша жағдай тұрақты бақылауда.