Жылуға жүрміз жете алмай
«Қыстың қамын жаз ойла» дейді бабаларымыз. Тәмсілдің мәнін ұғынған қыстың суығына қамданып, етек-жеңін ертерек жияды. Жылу қажеттілікке айналар күн де жақын. Алайда осы мәселеде алдын ала дайындалып, салқынға сақадай-сай отыру қанға сіңбей келеді.Күннің райы қуантпай тұр. Қазірден қалың киініп, жағдайы қиындай бастаған жұрт жылудың қосылмай жатқанына наразы. Бірі «балаларымыз ауырып қалады» деп уайымдаса, енді бірі пандемия кезінде өз денсаулығын нашарлатып алуға қорқады. Қалай десек те мемлекеттің басты капиталы – адам саулығы алғашқы орында тұруы керек. Кент жылумен қашан қамтылмақ? Ел тілегі ескеріле ме?
Бұл туралы жылудың қосылып, аталған маусымның ашылуына жауапты «Қызылорда жылу электр» тарату орталығының «Қазалы теміржол жылу» филиалының бас инженері Нұрылда Байсақалов: «Жылу маусымына толық дайынбыз. Алайда кентке жылудың қосылатын мерзімі облыстық энергетика басқармасы мен аудан әкімінің тапсырмасына байланысты. Мәселен, өткен жылы 8 қазанда іске қосуды тапсырса, 9 қазан күні жылу беруді бастап кеттік. Биыл да шамамен сол мерзімге қарай жылу қосылады деп жоспарлаудамыз», – дейді.
Жалпы елімізде жылыту маусымы әлеуметтік инфрақұрылым үшін 1 қазанда, тұрғын үйлер үшін 15 қазанда басталады. Бірақ белгілі бір министрлік тарапынан нақты бекітілмегендіктен, елдегі әр өңірде жылу беру мен тоқтату ауа райына байланысты қолға алынуда. Жоғарыда айтқанымыздай, қысы суық, өкпек желі өңмеңінен өтетін қазалылықтар жылу маусымы 1 қазаннан басталса деген тілектерін жеткізген. Алайда жылу маусымы жайлы жаңа ақпарат көңілді де жылытпай тұр.
Дина БӨКЕБАЙ
