Аудан басшысы алдымен Қазалы ауданаралық ауруханасына ат басын бұрып, дайындық жұмыстарының барысымен танысты. Бас дәрігер Бақытгүл Әлішеваның айтуынша, Қазалы ауданаралық ауруханасы қысқы жылу беру маусымына тас-түйін дайын.

Аурухананың жылу қазандығы өткен жылы көгілдір отынға ауыстырылған. Қазіргі таңда 3 табиғи отынмен жылытылатын бу қазандығы бар. Сондай-ақ, қосымша 1 сұйық отынмен жылытылатын бу қазандығы дайын тұр. Оған қажетті 10 тонна сұйық отын қоры да қарастырылған.

Сондай-ақ, Бақытгүл Әлмәмбетқызы Қазалы ауданаралық ауруханасына қарасты емдеу мекемелерінің қысқы жылу беру маусымына дайындық жұмыстары назарда тұрғанын жеткізді.

Аудан басшысы мұнан соң Құбыл Ршымбетов басшылық жасайтын теміржол ауруханасына жол тартты. «Қазалы теміржол ауруханасы» ЖШС директоры Құбыл Ршымбетов Мұхтар Әуесұлына емдеу мекемесіндегі жағымды жаңалықтардан хабардар етті.

Білікті дәрігердің айтуынша, жақында ауруханада МРТ орталығы мен ПТР зертханасы іске қосылады. Қазіргі таңда қажетті құрал-жабдықтар сатып алынып, мамандар қосымша курстан өткен.

Аудан әкімі Мұхтар Оразбаев біздің ауданнан ПТР зертханасының ашылуы жағымды жаңалық екенін атап өтті. Бұған дейін аудандағы ПТР тест сынамалары Қызылорда қаласы мен Арал ауданына жөнелтіліп келген болса, енді оның қорытындысын өзіміздің ауданнан да анықтауға болады.

Мұнан соң «Қазалы теміржол ауруханасы» ЖШС директоры Құбыл Ршымбетов қысқы жылу беру маусымына дайындық жұмыстары айтып, бұл бағытта ешқандай мәселе жоқ екендігін тілге тиек етті.