Облыс әкімінің орынбасары Бахыт Жаханов бастап, жәр­мең­кеге өңірдің жеті ауданы мен Қызылорда қаласының 70-ке жуық шаруашылығы мен кәсіпорны қатысты. Жылдағы дәс­түрмен таңертеңгісін басталған сауда бұл жолы да өзіндік сәнімен өрнек­телді. Күн қабағы да Сыр елі халқының ашық-жарқын, жайдарлы мінезіндей кеңшілік танытты. Сол күнгі ауа райының жайлы болуын елордалықтар да осылайша қабылдап жатты.

Жәрмеңкеде жалпы құны 100 млн теңгені құрайтын 440 тоннадан астам ауылшаруашылық өнімдері сатылды. Соның ішінде 207 тонна ақталған күріш, 27 тонна балық және балық өнімдері, 28 тонна асқабақ, 126,5 тонна бақша, 18 тонна көкөніс пен жеміс және 14,5 тонна басқа да өнім түрлері ұсынылды.

– Ауыл шаруашылығы өнімдерінің жәрмеңкесіне 47 автокөлікпен 447 тонна өнім алып келдік. Негізгісі, өңір бренді – күріш, әрине. 186 тонна көкөніс, бақша өнімдері келді. Сонымен бірге сүт өнімдері де бар. Тез бұзылатын сүт өнімдері секілді тауарларды арнайы рефрижератор көлігімен жеткіздік. Мұндағы коммуналдық базарлардың бағасын қарап шықтық. «Егін даласынан сөреге дейін» атты акциямен келіп отырғандықтан,  нарық бағасынан 10-20 процентке төмен сатылуда, – деді облыстық ауыл шаруашылығы басқармасының басшысы Шахмардан Қойшыбаев.

Жәрмеңкеде әдеттегідей, Аралдың балығы мен Сырдың ақ күрішіне сұраныс өте жо­ғары болды. Су маржаны мен Сыр маржаны сатылып жатқан сөре маңы түс ауғанша ұзын-сонар кезектен босаған жоқ. Қызылорданың тіл үйірер қа­уыны мен қарбызының да сау­дасы қызды. Таңдағанына қол жеткізген жұртшылықтың жүздерінен қуаныш сезімін байқамау мүмкін емес еді. Сонымен бірге, ет және сүт өнімдеріне де талғампаз нұр­сұлтандықтардың сұранысы ерекше болды. Әсіресе бағасы 2000 теңгеден сатылған жылқы еті мен 1700-ден ұсынылған сиыр еті өтімді болды. Ал балықтың келісі 1000-1200-ден бағаланды.

Шара барысында елорда­лық­тардың көңіл-күйін білу мақсатында бірқатар тұтыну­шы­ларды сөзге тартқан едік. Солардың бірі – қала тұрғыны Гүлдариғаш Қалқабаева. Бай­қоңыр қаласының тумасы 20 жылдан бері Нұр-Сұлтанда тұ­рады. Қызылорданың жәрмең­кесіне жылда келеді екен.

– Туған жерімнің жәрмең­кесінен қалмаймын. Сыр кү­рішіне тең келер ештеңе жоқ ғой, биыл да молынан алдым. Қауын-қарбыздан да қа­ла­­ға­ным­ша алдым. Етті де ұмыт­қа­ным жоқ. Нұрсұл­тан­дық бол­ғанымызға жиырма жыл болса да, туған жерім – Қы­зылордама бүйрегім бұрып тұрады. Ауыл көшіп келгендей, жәрмеңке өтсе, бір жасап қаламын, – деді ол.

«Қауіпті індетке байланыс­ты биыл жәрмеңке өтпейтін шығар деп ойлап жүр едім. Қы­зылорданың жәрмеңкесі өте­ді дегенді естіп қуандым. Өте жақсы ұйымдастырылған. Аралдың балығы өте керемет, Қызылорданың күріші қандай?! Биыл да ертемен келдім. Өзіме керек-жара­ғым­ды түгел алдым. Күннің өзі бүгін ерекше болып тұр, ашық, жылы, – деді қала тұрғыны Бауыржан Ибашов.

Жәрмеңкеде ҚР Парламенті Мәжілісінің депутаты Бақыт­бек Смағұловты да жо­лық­тырдық. Арнайы келіпті.

– Елорда төрінде өтіп жат­қан жәрмеңкеден еңбеккер­ле­ріміздің маңдай тер, еткен еңбегінің жемісін көріп отыр­мыз. Арнайы келіп, кө­ріп шықтым. Тауар тұты­ну­шыларға қолжетімді бағада сатылып жатыр. Сыр салысынан бастап, дәмі тіл үйірер қауын-қарбызы қандай?! Сыр байлығымен бірге халқымен қауышып жатырмыз. Осындай өнімдерді елордалықтарға ұсынған диқандарға, азамат­тарға алғыс айтамын, – деді ол.

Жәрмеңкеге облыстың әр ауданы, әр шаруашылығы тың­ғылықты дайындықпен келгені аңғарылады. Мәселен, бір ғана Әділбек Айымбетов жетекшілік ететін «Арал балық дайындау» зауыты 3 тоннадан аса балық және балық өнімдерін ала кел­ген. Жәрмеңкеде Қазалы кәм­питіне де сұраныс жоғары болды. Өзін кәмпит зауытының елордадағы дистрибьютерімін деп таныстырған Серік Тоқ­мамбетов жәрмеңкеге 2 тон­­надан астам кәмпит әке­лін­­генін, Қазалы кәмпиті мұн­­дағы тұрғындарға жақсы та­ныс еке­нін және сауда сәтті бол­ғанын айтты. Ал шиелілік омарташы Қасым Сайрамбаев жәрмеңкеге  бір тоннадан астам бал жет­кізген. Омар­ташы жантақ, жо­ңышқа балының келісін 1500-2000 теңгеден ұсынды.

Биыл ай­мақтың аграрлық саласы ай­тарлықтай жетістікке иек артып отыр. Егіс көлемі 184,2 мың гектарды құраған. Дәнді дақылдар 99,9 мың, майлы дақылдар 5,7 мың, малазықтық дақылдар 61 мың, картоп, көкөніс, бақша 17,6 мың гектарды құраса, негізгі дақыл – күріштің көлемі 89,5 мың гектарға жеткен. Өңірде күріш ору қызу жүргізіліп, әр гектарынан орташа 49,3 центнерден өнім алынуда.

Жалпы егіс көлемі 2014 жылмен салыстырғанда 25 мың гектарға артса, әртараптандыру бағытында кейінгі алты жылда малазықтық дақылдар 8 мың гектарға, майлы дақылдар 6,9 мың, ал күріштен басқа дәнді дақылдар көлемі 3,7 мың гектарға ұлғайған. Сонымен қатар, облыста картоп, бақша және ет, сүт өндіруде ілгерілеу бар.

Сыр елінің ауыл шаруашы­лығы өнімдері қазір 17 мемлекетке экспортталуда. Экс­порт­талған өнімнің 92,4 про­центі күрішке тиесілі. Ол Ресей, Қырғызстан, Беларусь, Әзер­байжан, Моңғолия, Тәжікстан, Украина, Түркіменстан және Ирак мемлекеттеріне шығары­луда.

Екі күнге созылған жәрмең­ке елорда жұртшылығын осылайша бір қуантып тастады.