Жәрмеңкенің басты артықшылығы – сөреге қойылған өнімдердің барлығы дерлік қолжетімді бағада сатылды. Олай болатын себебі де бар. Мұнда негізінен жергілікті жерде өсірілген өнімдер саудаға салынды.

Жәрмеңкеге Алға, Аранды, Көларық, Арықбалық, Сарбұлақ, Құмжиек ауылдық округтері қауын-қарбыз, қой-ешкі және жем-шөп алып келсе, тағы бір кәсіпкер картоп және көкөніс өнімдерін сатты. Сауда көркін қыздырушылар қатары қалың болды. Әсіресе, картоп пен жуаны таласа алып жатқандарды көптеп кездестіруге болады. Ұйымдастырушылардың айтуынша, жәрмеңкеге шығарылған заттар базар бағасымен салыстырғанда, бірнеше пайызға арзан ұсынылған. Картоп пен жуаның келісі 90 теңге болса, Қазалының қара күләбісі 100-300 теңгенің аралығында саудаланған. «Азық-түлік бағасын тұрақтандыру мақсатында қыркүйек-қазан айларында ауылшаруашылық жәрмеңкесі жүйелі өткізіліп тұрады. Өткен сенбіде 40-45 тоннаға жуық өнім әкелінді. Өнімдер нарықтан 10-15 процент төмен бағада бағаланды. Алдағы сенбі де Қазалы қаласындағы «Талап» автотұрағы алаңында өтеді деп жоспарлануда», – дейді ауыл шаруашылығы бөлімінің басшысы Нұрлан Аманбай.

– Таңертеңмен жәрмеңкеге бардым. Базар нырқынан әлдеқайда арзанырақ. Үйге қажетті азық-түліктерді алдым. Тұрғындар риза, өйткені бізге тиімді. Ұйымдастырушылардың «Жәрмеңке әр сенбі өткізіліп тұрады» деген сөзі көңілге қуаныш ұялатты, – дейді кент тұрғыны Марал Ақназарова.