Биыл бюджеттен 1 млрдқа жуық ақша бөлініп, Майдакөл ауылдық округінде ауқымды жобалар қолға алынды. Ең бастысы тұрғындар көптен айтып жүрген ауыз су сервистік желіге қосылады. Бүгінгі таңда құрылыс жұмыстары қарқынды жүргізілуде. Соның нәтижесінде ауыл халқы ауыз суды көшеден тасымай, үйден алатын күн алыс емес. Одан бөлек 7 көшеге асфальт төселіп, 8 көшеге жарықшамдар орнатылады. Ауылдағы №24 мектепке де күрделі жөндеу жұмыстары жүргізілді.

Бекарыстан би ауылына көршілес орналасқан Майдакөлде де толымды тірліктер бар. Биыл осындағы орталық алаң абаттандырылып, ауылдың ажары айшықталып келеді. Одан бөлек ауылдағы 3 көше орташа жөндеуден өтті.

Қазіргі таңда дарияның арғы бетіндегі қос ауылдағы құрылыс жұмыстары аяқталуға жақындап қалды. Бүгін Бекарыстан би мен Майдакөл ауылдарындағы қарқынды құрылыспен танысқан аудан әкімі Мұрат Ергешбаев мердігер мекемелердің жауапты қызметкерлеріне жауапты жұмысты уақытылы әрі сапалы аяқтауды тапсырды. Мемлекеттен қыруар қаржы бөлінген бұл жобалар әрдайым назарда болатынын айтып, тиісті бөлім басшылары әрбір жұмысқа жанашырлықпен қарау керектігін жеткізді.