Күн жаманы кетер
Тарих парақтарынан қазақ халқының талай зобалаң мен сынақты бастан өткеріп, небір қиындыққа төтеп бергендігін жақсы білеміз. Біздің бойымызда ата-баба қанымен келген қайсарлық пен жігерлілік тулап жатыр. Сол себепті бүгінгі ұрпақ та қазіргі қиындыққа төтеп береді деп сенемін. Қысылтаяң шақта жұдырықтай жұмылып, ауызбіршілікті арттырар сәт туды. Президент Қасым-Жомарт Тоқаев өзінің үндеуінде айтқандай бәлкім, бұл біздің бірлігімізді байқау үшін берілген сынақ шығар. Мемлекет басшысының үндеуіне үн қосып, баршаңызды салауатты өмір салтын сақтауға, сақтық шараларын қатаң ұстануға шақырамын. Дана халқымыз «Күн жаманы кетер» деп бекер айтпаса керек. Бұл сәттер де өткен жылдардың елесінде қалып, әні-міне дегенше әлемді жайлаған індеттен толық айығар уақыттың да келер күні алыс емес деп ойлаймын.
Күн санап вирус жұқтырғандар саны өсіп келеді. Өмірден өтіп жатқандары қаншама. Осы орайда елімізде енгізілген екі апталық карантин режимін өте орынды деп санаймын. Бұл шешім өз нәтижесін береді деген үміт басым.
Бірінші байлық – денсаулық. Бұл сөздің мағынасын түсініп, батпандап кіріп, мысқалдап шығатын аса қауіпті дерттің бетін қайтаруда әр азаматтың амандығы үшін біркісідей күресе білейік.
Мінәжадин ӨТЕЕВ,
облыстық мәслихат депутаты
облыстық мәслихат депутаты
