Белгіленген ережені бұзбайық

Қазіргі таңда әлемдегі пандемиялық ахуал кім-кімге де оңайға соғып отырған жоқ. Барлық елдер індеттің таралуын тоқтату мен науқастарды емдеу үшін қолдан келген істің бәрін жасауда. Оның ішінде Қазақстан Республикасының Үкіметі аталған жағдайға ертерек қамданғанын айта кеткен жөн. Соның арқасында мемлекеттегі жағдай дер кезінде бақылауға алынды. Енді мәселені түбегейлі шешу үшін халықтың ауызбіршілігі мен карантин ережесін сақтауы маңызды.
Осыған орай ел Президенті Қасым-Жомарт Тоқаев карантин режимін сәуірдің соңына дейін созуды тапсырды. Бұл әлі де болса вирустың қауіптілігі сейілмегенін көрсетеді. Бірақ қаншама қилы заманда ұлт амандығын, құндылықтары мен қоса бір-біріне деген бауырмалдылығын сақтап қалған қазақ жұрты бұл кеселді де оңай еңсеретініне сенімдімін. Оның үстіне қазақ халқы кез келген қиындыққа шыдамды, ауруды оңай еңсере алатын қасиетке ие екенін естеріңізге саламын. Десек те қазалылық жерлестерімді үйден себепсіз шықпай, карантин ережелерін сақтауға шақырамын. Дәл бүгінгі күні миллионнан астам адамға жұғып, үлгерген вирустан қорғанудың бұдан асқан емі жоқ. Сол үшін де «Күн жаманы кетер» дегендей бәріне шыдамдылық көрсетіп, жігерімізді жаныйық. Бастысы жауапты сала мамандарының кеңесін бұлжытпай орындап, үйде қалып, тиісті орындардың өнімді жұмыс істеуіне кедергі келтірмейік, ағайын!

Батырбек ТӘҢІРБЕРГЕНОВ,
№249 мектеп-лицей директоры