Ата-аналар қашықтан оқу форматына көшкен балалары ҰБТ-ға нашар дайындалады деп уайымдап отыр. Ал тестілеу орталығындағылар қашықтан оқу оқушылардың тестке дайындалуына кедергі келтірмейтінін айтты.

"Оқушыларға төртінші тоқсан бағдарламасынан сұрақтар берілмейді. Яғни, тек 5-сыныптан бастап 11-сыныптың үш тоқсанына дейінгі аралықта сұрақ қойылады. ҰБТ-ны өткізуде бұрынғы формат сақталады, алайда біз қосымша санитарлық шектеу шараларын енгіземіз", - деді Дидар Смағұлов.

Сонымен қатар тест тапсырушылар арасындағы қашықтық ұлғаяды. Жергілікті жерлерде барлық оқушының дене қызуы тексеріледі.

Естеріңізге сала кетейік, коронавирус індетіне байланысты төртінші тоқсанда оқушылар қашықтан білім алуға көшті. Биыл олар бітіру емтихандарын тапсырмайды.

Білім және ғылым министрлігі ҰБТ-ны дәстүрлі түрде маусымның аяғында өткізуді жоспарлап отыр. Алайда министрлік коронавирусқа байланысты жағдай ушығып, карантин режимі жалғасатын болса, Б жоспарына көшетіндерін айтты.