Аталмыш іс-шара ұлттық дәстүрімізді көздің қарашығындай сақтап, оны байыту және қайта жаңғырту, жастарды ұлттық рухта тәрбиелеу мақсатында жүзеге асырылады. Сондай-ақ, талантты жастардың өнерін қолдай отырып қала мәдениеті мен өнерін дамытуға көңіл бөлінеді. 

«Осы орайда жаз мезгілінде қала қонақтары мен тұрғындарының, әсіресе, жастардың бос уақытын тиімді және қызықты өткізу үшін Қызылорда қаласындағы «Aray city mall» сауда және ойын-сауық кешенінің фойесінде аптасына бір мәрте қалалық мәдениет және тілдерді дамыту бөліміне қарасты мәдениет үйлері өнерпаздарының концерттік бағдарламасын ұйымдастыру қолға алынып отыр», - деді Қызылорда қалалық мәдениет және тілдерді дамыту бөлімінің мамандары. 

«Мәңгілік мәдениет» жобасы аясында жергілікті «Сырлы саз» халықтық-фольклорлық ансамблінің «Домбыра-дастан» атты концертін көпшілік назарына ұсынды. Аталмыш өнер ұжымы түрлі деңгейдегі көптеген шараларда өнер көрсетіп келеді. Халықтық-фольклорлық ансамблінің репертуарында күй атасы -  Құрманғазының «Балбырауын», «Адай», «Сарыарқа», «Серпер» күйлерімен қатар, дәулескер күйші Н. Тілендиевтің «Әлқисса», «Ата толғау», Дәулеткерейдің «Көрұғлы», Түркештің «Көңілашар» күйлері бар. Сондай-ақ, концерттік бағдарлама барысында әртүрлі күйлер топтамасынан күй-тартыс ұйымдастырылады. 

Былтырдан бері Қызылорда қаласындағы Орталық алаң маңындағы «Өнер арбаты» бойында көптеген іс-шаралар ұйымдастырылды. 

Онда өнерпаздар күз мезгіліне дейін апта сайын сан алуан шараларды өткізуді жоспарлап отыр. Бұдан бұрын Сыр өңіріндегі көне Қышқала қалашығын зерттеушілер жаңа деректерге қол жеткізгенін хабарлаған едік.