Сырдың сырлы жәдігерлері

Қызылорда облыстық тарихи-өлкетану музейінде Елбасының "Болашаққа бағдар: Рухани жаңғыру" бағдарламалық мақаласындағы арнайы жобалардың бірі "Қазақстанның киелі жерлерінің географиясы" жобасын жүзеге асыру мақсатында бірқатар шаралар өткізілді.

Өлкеміздің тарихынан сыр шертетін экспонаттардан облыстық деңгейде «Сырдың сырлы жәдігері» тақырыбында А.Тоқмағамбетов атындағы мәдениет үйінде көрме ұйымдастырылды. Көрмеге музей қорларында жинақталған Сыр елінің қатпарлы тарихын, өнері мен мәдениетін, өнеркәсібін айқындайтын құнды экспонаттар қойылды. Атап айтсақ, ақ білектің күшімен ел қорғаған Бұқарбай батырдың мөрі мен қылышы, Арал өңірінің тумасы, елге белгілі қолөнер шебері, зергер – Құдайберген Құлмамбетовтің ағаштан жасалған бұйымдары, облыстық музей қорындағы археологиялық экспедициялық-қазба жұмыстары кезінде табылған керамикалық ыдыстар мен этнографиялық және зергерлік бұйымдар, «Ер қаруы – бес қару» яғни батырларымыздың қару-жарақтары қылыш, найза, айбалта, шоқпар, садақ тағы да басқа құнды дүниелер көрмеден орын алды.