2026 жыл Цифрландыру және жасанды интеллект жылы болып жарияланды
Озық технологиялар еліміздің барлық саладағы әлеуетін арттыруға жол ашпақ
Фото: freepik.com/ЖИ арқылы жасалды
Фото: freepik.com/ЖИ арқылы жасалды
2026 жыл Цифрландыру және жасанды интеллект жылы болып жарияланды. Бұл туралы мемлекет басшысы Қасым-Жомарт Тоқаев мәлімдеді, деп хабарлайды Azattyq Rýhy.
Президенттің айтуынша 2026 жылы Қазақстан жаңғырудың жаңа кезеңіне қадам басады.
«Еліміздің жарқын келешегі үшін алдағы конституциялық реформаның мән-маңызы зор. Азаматтарымыз Қазақстанның өсіп-өркендеуіне тың серпін беретін бұл реформаны қолдайды деп сенемін. Біз энергетикалық әлеуетімізді нығайтып, агроөнеркәсіп кешені, су шаруашылығы мәселелерін шешіп, көлік-логистика саласын және тұрғын үй-коммуналдық шаруашылығының инфрақұрылымын дамыта береміз», - деді ол жаңа жылдық құттықтау сөзінде.
Тоқаев шағын және орта бизнес әрдайым мемлекеттің назарында болатынын атап өтті. Барлық өңірде жаңа кәсіпорындар ашылып, жолдар жөнделеді, сондай-ақ тұрғын үйлер, мектептер, денсаулық сақтау, спорт және мәдениет нысандары бой көтереді.
«Мен биылғы Жолдауымда Цифрлық мемлекет болуымыз керектігін жарияладым. Сондықтан келесі жылды Цифрландыру және жасанды интеллект жылы деп атау туралы шешім қабылдадым. Озық технологиялар еліміздің барлық саладағы әлеуетін арттыруға жол ашпақ», - деп толықтырды мемлекет басшысы.
Сондай-ақ ол «Ұлттық қор – балаларға» жобасы аясында осымен үшінші жыл қатарынан әр баланың есепшотына қаражат түсетінін еске салды.
«Мемлекет өзінің әлеуметтік міндеттемелерін орындай береді. Біз білім беру және денсаулық сақтау салаларын дамытуға әрдайым айрықша назар аударамыз», - деп түйіндеді ол.
