Тұрғындарға тиімді баға

Өткен аптаның соңы аудан орталығындағы күйбең тіршілік, абыр-дабыр қозғалыспен аяқталды. Өйткені мұнда тұрғындар үшін ауыл шаруашылығы өнімдерінің жәрмеңкесі өтті. Сатылған азық-түлік күнделікті сауда орындарындағы бағамен салыстырғанда едәуір төмен болды.
Жәрмеңке – Әйтеке би кентіндегі «Нұршуақ» автобекетінде өтті.

Мақсат – жергілікті тауар өндірушілерді қолдау, тұрғындарды қолжетімді бағадағы сапалы азық-түлік өнімдерімен қамтамасыз ету. Жәрмеңкеге Қазалы ауданынан барлығы 87 тоннаға жуық ауыл шаруашылығы өнімдері шығарылды. Бекітілген кестеге сәйкес, қала, кент және ауылдық округтер мен жергілікті тауар өндірушілерден әрқайсысынан 1 автокөліктен қатыстырылып, барлығы 26 автокөлік жұмылдырылды. Жәрмеңке барысында тұрғындар тарапынан үлкен сұраныс байқалып, жергілікті өнімдердің сапасына оң баға берілді.

Сауда таңсәріден қызу басталып, ұзын-сонар кезек қалыптасты. Кәсіпкерлердің айтуынша, олардың тауарларының бағасы қарапайым дүкендерге қарағанда төмен. Бұл – қажет нәрсенің бәрін ұзақ мерзімге тиімді жолмен сатып алуға жақсы мүмкіндік. Азық-түлік жеткілікті көлемде сатылды. Қалта көтеретін сауданың қызғаны соншалық, өнімдер ертерек сатылып кетті. Ең бастысы, тұтынушы да, сатушы да дән риза.

А.АЙДАРҚЫЗЫ