Кезектен тыс сессия өтті
Жуырда ауданның әлеуметтік-экономикалық дамуына бағытталған маңызды шешімдер қабылданатын аудандық мәслихаттың кезектен тыс 45-інші сессиясы өтті. Қоғамдық маңызы зор мәселелер талқыланған бұл жиынға аудан әкімі Алмасбек Есмахановпен бірге қала, кент және ауылдық округ әкімдері, дербес бөлімдердің басшылары, сондай-ақ жеке кәсіпкерлік өкілдері қатысты. Сессия жұмысына аудандық мәслихат төрағасы Ғазиз Әліш жетекшілік етті.Бұл жолғы сессияның күн тәртібі аудан тұрғындарының әл-ауқатын жақсартуға, кәсіпкерлікті дамытуға және елді мекендердің аумақтық мүмкіндіктерін кеңейтуге бағытталған бірнеше өзекті мәселені қамтыды.
Атап айтқанда, «Қазалы ауданының әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы», «Орман қоры жерлерін елді мекен жеріне ауыстыру туралы» және «Қазалы ауданы бойынша оңайлатылған декларация негізінде арнаулы салық режимін қолдану кезінде салық мөлшерлемесінің мөлшерін төмендету туралы» мәселелері жан-жақты қаралды.
Сессия барысында аудан әкімі Алмасбек Әбілқасымұлы тұрғындарды әлеуметтік қолдауға, кәсіпкерлік ахуалды жақсартуға және ауылдық аумақтардың дамуына бағытталған бұл шешімдердің айрықша маңызын атап өтті.
Әсіресе, оңайлатылған декларация негізінде қолданылатын арнаулы салық режимінің мөлшерлемесін 4 пайыздан 2 пайызға дейін төмендету – шағын және орта кәсіпкерлікті қолдауға арналған нақты әрі дер кезінде қабылданған қадам екеніне тоқталды. Мемлекет басшысы Қасым-Жомарт Тоқаевтың кәсіпкерлікті жан-жақты қолдау жөніндегі тапсырмаларын негізге ала отырып жасалған бұл өзгеріс жаңа жұмыс орындарының ашылуына, аудан экономикасының жандануына оң әсер ететінін жеткізді.
Кәсіпкерлер қауымының атынан сөз алған Алтынкүл Құрақбаева да салықтық жеңілдіктің маңызын атап, аудан басшылығына және депутаттарға өз алғысын білдірді. Оның айтуынша, мұндай қолдау кәсіпкерлердің жұмысын жеңілдетіп қана қоймай, олардың дамуына тың серпін береді.
Сессия соңында депутаттар ұсынылған барлық мәселелерді талқылай отырып, дауыс беру нәтижесінде тиісті шешімдерді қабылдады.
Бекзат АСАН
