Қазақтың жырын, фольклорын, жалпы, қазақ өнерін Сыр өңірінсіз елестету мүмкін емес. Онсыз бір қабырғасы ойсырап тұрар еді. Бүгінгі халықаралық поэзия кешінің осындай киелі топырақта өтуі – заңды құбылыс. Шараны түсініп, қолдап, ұсынысты аяқсыз қалдырмай, жүзеге асуына септігін тигізгені үшін аймақ басшысы Қырымбек Көшербаевқа ерекше алғыс айтамын.

Елең-алаң шақта халық әдебиеттен алыстап қалғаны рас. Одан кейін ес жинады да, қайтадан кітап оқып, әдебиетті іздей бастады. Сыр өңіріндегі бүгінгі шара өлең-жырға сусаған оқырманды рухани тұрғыдан кемелдендіре түсері анық. Алдағы уақытта ауқымы кеңейіп, ақындар жылына немесе екі жылда бір рет бас қосып тұрса деген тілегім бар.