АЛҚАПТАРДА ӘРҚИЛЫ, СЫҚЫРЛАП ЕГІН ТОЛҚИДЫ

Жер сызы кетісімен дала төсінде көктемгі егін жұмыстарына дайындық басталды. Мол өнім алуға білек-сыбана кіріскен аудан еңбеккерлерінің қазіргі жайы қалай? Дала жұмысына дайындық қандай?

Биыл ауданда 18 245 гектар жерге ауыл шаруашылығы дақылдарын орналастыру, оның ішінде негізгі дақыл күрішті – 6436 гектарға егу жоспарлануда. Көктемгі дала жұмыстарына дайындық шаралары аудан әкімінің де бақылауында. Әрбір әрекет пысықталып, тұқым дайындау, минералды тыңайтқыштар мен жанар-жағармай қорын қалыптастыру, техникаларды әзірлеу сынды мәселелерді алдын алу жұмыстары жүргізілуде.

Соңғы жылдары су тапшылығына байланысты қиындықты еңсеру үшін түрлі шаралар жасалуда. Аймақта суды көп қажет ететін күріш дақылын егу оңай болмай тұр. Сол үшін суды үнемдеу мақсатында күріш көлемін азайтып, бақша дақылдарының ауқымын арттыруда. Тамщылатып суару технологиясын қолданысқа енгізді. Тамышатып суару әдісі – өнімділікті арттырады. Бұл әдіс – өсімдіктің тамырына суды, тыңайтқыштарды және өсімдіктерді зиянкестерден қорғайтын агрохимиялық заттарды дәл әрі біркелкі жеткізу үшін қолданылады. Суарудың мұндай түрі тыңайтқышты да, суды да қажет мөлшерде пайдалануға мүмкіндік береді. Әрине, осылай суды үнемдеу үшін бізде де су үнемдеу технологиясы қолданылады. Жаңбырлатып суғару тәсілімен «РЗА» АҚ-ы 269 гектарға сүрлемдік жүгері дақылын орналастырмақ. Ал «Smart Agro» шаруа қожалығы тамшылатып суғару тәсілімен 6 гектар жерге бақша дақылдарын орналастырады.

Сонымен қатар суармалы суды үнемдеу мақсатында 2011 жылдан бастап «РЗА-Агро» жауапкершілігі шектеулі серіктестігі 4547 гектар егістік жерге «МАРА» лазерлік агрегаттарымен тегістеу жұмыстарын жүргізген. 2025 жылға 440 гектар жерді тегістеу жоспарланып отыр.

Айта кететін жайт, биылғы егістік жұмыстарына қарекет Үкіметтің де назарынан тыс қалмады. Премьер-Министр Олжас Бектеновтің төрағалығымен өткен Үкімет отырысында көктемгі егін жұмыстарына дайындық, агроөнеркәсіп кешенін цифрландыру мәселелері қаралған болатын. Облыс бойынша атқарылып жатқан жұмыстардың да қарқыны мығым. Жалпы, алдағы науқанда облыста 190 мың гектарға ауыл шаруашылығы дақылдары егілмек. Соның ішінде Үкіметтің Жол картасына сәйкес күріш егісі 80 900 гектар болып бекітілген. Бұған қосымша тағы 5 мың гектар күрішті қашыртқы сумен, жерді лазерлік тегістеу арқылы үнемделген сумен суару көзделіп отыр. Аймақта ауыл шаруашылығы құрылымдары тұқыммен 100 пайыз қамтамасыз етілген. Әрі алдағы науқанға қажетті 64 600 тонна тыңайтқыштың 11 300 тоннасы отандық өнім екен. Биыл былтырғы жылмен салыстырғанда жалпы егіс көлемін 539 гектарға ұлғайту көзделген. Оның ішінде күріштің көлемі 350 гектарға және егістікті әртараптандыру мақсатында мал азықтық дақылдарды 880 гектарға, картоп, көкөніс, бақшаның көлемін 208 гектарға арттыру межеленуде. Ерте егілетін дақылдарды орналастыру жұмыстары наурыз айының бірінші онкүндігінде басталса, күріш дақылын сәуір айының үшінші онкүндігінде бастау жоспарлануда.

Сонымен, аудандағы дала жұмыстарына дайындық қарқынды жүргізілуде. Шаруаларға да қолдау жан-жақты көрсетілуде. Бұйырса дала төсінің қызу еңбектің дүбіріне айналатын күні де алыс емес.