Дүниежүзілік көшпенділер ойындары: бүгін бес түрлі жарыс өтеді

13 қыркүйек күнгі жарыс кестесіне жүгінсек, «Қазанат» ипподромында ат жарыстары өтеді, сағат 09:00-да 1 600 метр қашыққа ұшқыр бəйге, 9:30-да 2,4 шақырымға ұшқыр бəйге өтіп, 10:00-де 3,2 шақырымға ұшқыр жүйріктер жарысады.

Сағат 11:00-де 11 шақырымға құнан бəйге, 11:45-те 18 шақырымға топ бəйге өтеді. 12:45-те 09:00-де шақырымға жорға жарысы, сағат 13:30-да 25 шақырымға аламан бəйге өтеді.

Этноауыл теңге ілудің жеті құт бөлімінен іріктеу және ақтық сайысы өткізіледі. Теңге ілу ұзындығы 150 м, ені 20 м болатын арнайы жабдықталған алаңда өтеді. Жарыс республикалық «Теңге ілу» федерациясының ережесіне сәйкес ұйымдастыралы.

Сағат 10-да этноауылда құсбегілік жарыстары басталады. Бүркіт, қаршыға, ителгі салудың ақтық кезеңі ұйымдастырылады. Жеңімпаздарды марапаттау рәсімі сағат 12:30 – 13:00 аралығында жоспарланған.

«Алау» мұз сарайында сағат 10-де асық атудың ордо түрінен ақтық кезең өтеді. Жарыстар ерлер арасында өткізіледі. Ордо тегіс жерде өтеді. Шеңбердің диаметрі 12 м. Ойын ұзақтығы 2 сағат. Шеңберден шығарған асықтар санына қарай жеңімпаз анықталады. Жарыс қырғыздың «Ордо Оюну» спорт федерациясының қолданыстағы ережесіне сәйкес өткізіледі.

«Думан» Қонақ үй жəне спорт комплексінде сағат 10-да түріктің зияткерлік ойыны мангаладан іріктеу және финалдық кезеңдер өтеді. Мангаладан ел намысын ерлер арасында Азамат Қайдаров, Биғали Зкрияев қорғаса, әйелдер арасында Құндыз Есіркеп пен Айкерім Қуанышбекова қорғайды.

Мангаланы екі адам ойнайды. Ойын тақтасында екі қатарда орналасқан алты бірдей шұңқыр болады. 12 кішкентай шұңқырдан басқа ойыншылардың тастарды жинайтын үлкен жинақтаушы шұңқыры болады. «Мангала» ойыны 48 таспен ойналады.

Еске сала кетсек, Астанада өтіп жатқан Дүниежүзілік көшпенділер ойындарының жабылу рәсімі көрерменсіз өтетін болды. Жабылу салтанатын қазақстандық телеарналардан тікелей эфирде көруге болады.

Естеріңізге сала кетейік, Дүниежүзілік көшпенділер ойындары аясында спортшылар 21 ойын түрі бойынша бақ сынап жатыр. Көшпенділер ойындарына әлемнің 89 елінен 2500-ге жуық адам жиналған.